دنیا بھر میں پاکستان کا نام روشن کرنے والے ارشد ندیم کے لیے عالمی شہرت یافتہ پاکستانی گلوکار علی ظفر نے نقد انعام کا اعلان کیا ہے۔
اولمپکس میں جیولین تھرو کے مقابلے میں گولڈ میڈل جیت کر تاریخ رقم کرنے والے ارشد ندیم کے لیے علی ظفر نے سوشل میڈیا پر انعام کا اعلان کیا۔ گلوکار نے اپنے پیغام میں ارشد ندیم کو پاکستان کے لیے پہلا طلائی تمغہ جیتنے پر مبارکباد دی اور کہا کہ علی زی فاؤنڈیشن کی جانب سے انہیں ایک ملین روپے کا انعام دیا جائے گا۔
علی ظفر نے اپنے پیغام میں کہا کہ ہمیں اپنے ہیروز کی کامیابی کا بھرپور جشن منانا چاہیے۔ انہوں نے حکومت پاکستان اور وزیراعظم شہباز شریف سے درخواست کی کہ ارشد ندیم کا استقبال ہیرو کی طرح کیا جائے اور ان کے نام پر ایک اسپورٹس اکیڈمی قائم کی جائے۔
علی ظفر نے یہ بھی کہا کہ اگر ہمارے ایتھلیٹس اور کھلاڑیوں کو مناسب سپورٹ ملنے لگے، تو ہم ہر سال 10 گولڈ میڈل جیت سکتے ہیں۔
