لاہور: پی ٹی آئی رہنما امتیاز علی وڑائچ کی کمرہ عدالت میں طبیعت خراب ہوگئی۔
لاہور کی انسداد دہشتگردی عدالت کے جج خالد ارشد نے جناح ہاؤس جلاؤ گھیراؤ کیس میں پی ٹی آئی رہنماؤں کی عبوری ضمانت کی درخواستوں پر سماعت کی۔
دوران سماعت عدالت نے کہا کہ جو ملزمان ایف آئی آر میں نامزد نہیں اور نہ ضمنی بیانات میں ان کا نام ہے، ان کا کیا کریں؟ جو نامزد نہیں، ان کے خلاف کوئی شہادت نظر نہیں آرہی۔ اسپیشل پراسیکیوٹر صاحب، آپ بتائیں ان کی گرفتاری کیوں درکار ہے؟
بعد ازاں، عدالت نے پی ٹی آئی رہنما اسد عمر، اعظم سواتی، علیمہ خان، عمر ایوب اور دیگر کی عبوری ضمانتوں میں 3 ستمبر تک توسیع کردی۔
سماعت کے دوران، پی ٹی آئی رہنما امتیاز علی وڑائچ کی کمرہ عدالت میں طبیعت بگڑگئی، جس پر انہیں عدالت سے باہر لے جایا گیا اور بار روم میں بٹھایا گیا۔
