پیرس اولمپکس میں پاکستان کے لیے میڈل کی امید ارشد ندیم نے 24 کروڑ پاکستانیوں کا خواب پورا کرنے کی جانب پہلا قدم اٹھاتے ہوئے جیولن تھرو کے فائنل میں جگہ بنا لی۔
منگل کو جیولن تھرو کوالیفیکیشن راؤنڈ میں، گروپ بی میں شامل ارشد ندیم کو فائنل میں براہ راست جگہ بنانے کے لیے کم از کم 84 میٹر کی تھرو کرنا تھی۔
ارشد ندیم نے پہلی کوشش میں 86.59 میٹر کی تھرو کرکے کوالیفائی کر لیا۔
ارشد ندیم اب 8 اگست کو جیولن تھرو ایونٹ کے فائنل میں حصہ لیں گے۔
یہ ارشد ندیم کا اولمپکس میں مسلسل دوسرا فائنل ہے۔ ٹوکیو اولمپکس میں ارشد ندیم نے پانچویں پوزیشن حاصل کی تھی۔
دوسری جانب، گروپ بی میں بھارت کے نیرج چوپڑا نے پہلی کوشش میں 89.34 میٹر کی تھرو کرکے جیولن تھرو کے فائنل راؤنڈ کے لیے کوالیفائی کر لیا۔
