وزیر خزانہ کا کہنا ہے کہ پاکستان کی بڑھتی ہوئی آبادی بم کی طرح پھٹ چکی ہے، اس پر قابو پانا ہوگا۔

اسلام آباد: وزیر خزانہ محمد اورنگزیب نے کہا کہ پاکستان کو موسمیاتی تبدیلی کے اثرات سے بچنے کے ساتھ ساتھ آبادی کو کنٹرول کرنا ہوگا، کیونکہ آبادی بہت زیادہ بڑھ چکی ہے اور ملک میں آبادی بڑھنے کا بم پھٹ چکا ہے۔

تقریب سے خطاب کرتے ہوئے، وزیر خزانہ نے کہا کہ اکتوبر میں سالانہ میٹنگ کے دوران آئی ایم ایف اور ورلڈ بینک سے کلائمیٹ فنانسنگ پر بات ہوگی۔ آئی ایم ایف پروگرام کی منظوری کے بعد ایگزیکٹو بورڈ سے کلائمیٹ فنانسنگ پر بھی بات کی جائے گی۔ رواں ماہ کے اختتام تک آئی ایم ایف ایگزیکٹو بورڈ سے اسٹاف لیول معاہدے کی منظوری ہو جائے گی۔

انہوں نے کہا کہ پاکستان موسمیاتی تبدیلی سے متاثرہ ممالک میں شامل ہے اور اس کے اثرات سے بچنے کے ساتھ آبادی کو کنٹرول کرنا ضروری ہے۔

وزیر خزانہ نے کہا کہ معاشی صورتحال بہتر بنانے کے لیے بجٹ، ٹیکس اقدامات، انرجی سیکٹر اور معیار زندگی بہتر بنانا ہوگا۔ وزارت خزانہ، وزارت موسمیاتی تبدیلی، آئی ایم ایف اور عالمی بینک کے ساتھ مل کر کام کر رہی ہیں۔ موسمیاتی تبدیلی کے منصوبوں کی مانیٹرنگ کو بہتر بنایا جائے گا اور موسمیاتی تبدیلیوں پر مبنی پالیسیاں بنانا ہوں گی۔

انہوں نے مزید کہا کہ ملکی معیشت کو بہتر بنانے کے لیے نجی شعبے کو بھی اپنا کردار ادا کرنا ہوگا۔