وزیر اطلاعات پنجاب عظمیٰ بخاری نے کہا ہے کہ ایف آئی اے سائبر ونگ کے پاس اپنے شعبے کی کوئی مہارت نہیں ہے، لہذا وزیراعظم سے گزارش ہے کہ اسے بند کروادیں۔
لاہور ہائیکورٹ کے باہر میڈیا سے گفتگو کرتے ہوئے عظمیٰ بخاری نے کہا کہ چیف جسٹس صاحبہ معاملے کو سمجھتی ہیں اور میرے خیال میں وہ معاملے کی تہہ تک پہنچنا چاہتی ہیں۔
وزیر اطلاعات نے کہا کہ ایف آئی اے سائبر ونگ کے پاس اپنے شعبے کی کوئی مہارت نہیں ہے اور یہ بالکل بےکار ہے۔ سائبر کرائم کو کچھ نہیں پتا اور نہ ہی انہیں معلوم ہے کہ انہوں نے کیا کرنا ہے۔ وزیراعظم سے گزارش ہے کہ ایف آئی اے کا سائبر کرائم ونگ بند کروا دیں۔
انہوں نے مزید کہا کہ ہمیں یہ چیز روکنا ہوگی ورنہ آج میں ہوں، کل کوئی اور ہوگا۔ کس نے انہیں عزتیں اچھالنے کا اختیار دیا ہے؟ جب سے یہ فتنہ پارٹی کا وجود سامنے آیا ہے تب سے یہ گند سامنے آیا ہے۔ فیک ویڈیو کی تربیت نہ گھر کی ہے نہ پارٹی کی، ورنہ یہ سب ہمیں بھی کرنا آتا ہے۔ بشریٰ بی بی کی کوئی ڈیپ فیک ویڈیو نہیں بنائی گئی۔ بشریٰ بی بی نے عدت میں نکاح کیا تو کیا یہ میری غلطی ہے؟
عظمیٰ بخاری نے کہا کہ میرے بیٹے کے ساتھ میری تصویر لگا کر جو کچھ کہا جا رہا ہے، کیا کسی کو شرم آئی؟ میں زندگی کی آخری سانس تک اپنا کیس لڑوں گی اور انصاف کے تمام دروازے کھٹکھٹاؤں گی۔
