نائب وزیراعظم اسحاق ڈار نے کہا کہ بھارت مقبوضہ کشمیر میں مسلم اکثریت کو اقلیت میں تبدیل کرنے کے ناپاک عزائم رکھتا ہے اور یہ خام خیالی کرتا ہے کہ وہ مقبوضہ کشمیر کے عوام کا حق خودارادیت ختم کر سکتا ہے۔
اسلام آباد میں یوم استحصال کشمیر ریلی سے خطاب کرتے ہوئے اسحاق ڈار نے کہا کہ بھارت کا اقدام پانچ سال قبل کیا گیا غیر آئینی ہے اور اقوام متحدہ کی قراردادوں اور عالمی چارٹر کے خلاف ہے۔ بھارت نے اپنے آئین میں ترمیم کرکے عالمی قوانین کی خلاف ورزی کی ہے۔
انہوں نے کہا کہ بھارت کی خام خیالی یہ ہے کہ وہ مقبوضہ کشمیر کے عوام کا حق خودارادیت ختم کر دے گا، لیکن بھارت کا فیصلہ دنیا بھر میں قبول نہیں ہوگا۔ شہباز شریف کی حکومت عالمی سطح پر کشمیری عوام کا مقدمہ لڑ رہی ہے، اور جمہوریت کے علمبرداروں کو عالمی اداروں کو مقبوضہ کشمیر جانے کی اجازت دینی چاہیے۔
آج ملک بھر میں 5 اگست 2019 کے بھارتی اقدامات کے خلاف یوم استحصال کشمیر منایا جا رہا ہے۔
اسحاق ڈار نے مزید کہا کہ بھارت کے ناپاک عزائم ہیں کہ مقبوضہ کشمیر کی مسلم اکثریت کو اقلیت میں بدلے، پاکستان اور کشمیریوں کا تعلق علاقائی اور مذہبی ہے، کشمیر پاکستان کی شہہ رگ ہے اور ایک دن ضرور پاکستان میں شامل ہوگا۔
نائب وزیراعظم نے یہ بھی بتایا کہ او آئی سی نے اسلامو فوبیا کے خلاف اپنا نمائندہ مقرر کر دیا ہے اور ہم نے اہل غزہ کے حق میں بھی آواز بلند کی ہے۔
یاد رہے کہ بھارت کی مودی حکومت نے 5 اگست 2019 کو کشمیریوں سے ان کے باقی حقوق بھی چھین لیے اور بھارتی آئین سے آرٹیکل 370 ختم کر کے مقبوضہ کشمیر کے تین ٹکڑے کر دیے، جس سے مقبوضہ کشمیر کی ریاستی حیثیت بھی ختم ہو گئی تھی۔
