لاہور: صوبائی وزیر صنعت و تجارت چوہدری شافع حسین نے کہا ہے کہ پنجاب میں عالمی معیار کا فرنیچر کالج قائم کیا جائے گا تاکہ فرنیچر انڈسٹری کو جدید خطوط پر استوار کیا جا سکے۔ انہوں نے یہ اعلان لائف اسٹائل پراپرٹی و فرنیچر ایکسپو کی افتتاحی تقریب کے دوران کیا۔
تقریب سے خطاب کرتے ہوئے چوہدری شافع حسین نے کہا کہ فرنیچر انڈسٹری کے مسائل کو ترجیحی بنیادوں پر حل کیا جائے گا تاکہ مقامی صنعت کو فروغ ملے اور بین الاقوامی سطح پر پاکستان کا فرنیچر مزید مقبول ہو۔ انہوں نے نمائشوں کے انعقاد کو کاروباری سرگرمیوں کے فروغ کا ایک موثر ذریعہ قرار دیتے ہوئے کہا کہ اس طرح کے ایونٹس مقامی کاروبار کو نئی منڈیوں تک رسائی فراہم کرتے ہیں۔
چوہدری شافع حسین نے پاکستان میں تیار ہونے والے فرنیچر کے معیار کی تعریف کرتے ہوئے کہا کہ ملکی فرنیچر یورپ سمیت دنیا بھر میں پسند کیا جاتا ہے اور اس کی برآمدات میں اضافے کی بڑی گنجائش موجود ہے۔ انہوں نے اس عزم کا اظہار کیا کہ حکومت فرنیچر کی ایکسپورٹ کو مزید فروغ دینے کے لیے عملی اقدامات کرے گی، جس سے ملکی معیشت کو بھی فائدہ پہنچے گا۔
انہوں نے مزید کہا کہ جدید ٹیکنالوجی اور مہارت کی تربیت سے فرنیچر انڈسٹری کو مزید ترقی دی جا سکتی ہے، اسی لیے پنجاب حکومت عالمی معیار کا فرنیچر کالج قائم کر رہی ہے۔ اس ادارے میں نوجوانوں کو فرنیچر ڈیزائننگ اور مینوفیکچرنگ کی جدید تربیت دی جائے گی، جس سے اس صنعت میں مہارت یافتہ افراد کی تعداد میں اضافہ ہوگا۔
یہ اقدام نہ صرف ملکی معیشت کو مستحکم کرنے میں مدد دے گا بلکہ مقامی فرنیچر انڈسٹری کے فروغ کے ساتھ ساتھ پاکستان کی بین الاقوامی مارکیٹ میں ساکھ کو بھی مزید بہتر کرے گا۔
