وزیر اطلاعات پنجاب عظمیٰ بخاری نے کہا ہے کہ 9 مئی اور 26 نومبر کے نام نہاد انقلابیوں کو اگر انقلاب لانے کا اتنا شوق تھا تو اب قانونی کارروائیوں کا سامنا بھی کرنا ہوگا۔ انہوں نے یہ بیان پاکستان تحریک انصاف (پی ٹی آئی) کے رہنما عمر ایوب کے حالیہ تبصرے کے ردعمل میں دیا۔
عظمیٰ بخاری کا کہنا تھا کہ پنجاب پولیس نہ صرف کچے کے ڈاکوؤں کے خلاف کارروائی کر رہی ہے بلکہ پکے مجرموں کو بھی پکڑنے میں کوئی رعایت نہیں برتی جا رہی۔ ان کے مطابق پنجاب پولیس کسی بے گناہ شہری کو ہراساں نہیں کرتی، لیکن جو مجرم قانون کی گرفت میں آتے ہیں، انہیں ہر صورت انصاف کے کٹہرے میں لایا جاتا ہے۔
انہوں نے مزید کہا کہ پنجاب پولیس کی سب سے بڑی طاقت اس کا نظم و ضبط اور مؤثر قانون کا نفاذ ہے۔ ان کے مطابق صوبے میں سیاسی انتقام یا جھوٹے مقدمات قائم کرنے کا سلسلہ ختم ہو چکا ہے، اور اب تمام کارروائیاں غیر جانبداری سے کی جا رہی ہیں۔
عظمیٰ بخاری نے دعویٰ کیا کہ وزیر اعلیٰ مریم نواز کی قیادت میں پنجاب پولیس مکمل غیر سیاسی انداز میں کام کر رہی ہے اور کسی کے خلاف جانبدارانہ کارروائی نہیں کی جا رہی۔ ان کا کہنا تھا کہ 9 مئی کے واقعات میں ملوث افراد، جنہوں نے قومی شہداء کے مجسموں کی بے حرمتی کی، وہ سیاسی لبادہ اوڑھ کر انصاف سے بچ نہیں سکیں گے۔
انہوں نے واضح کیا کہ قانون کی حکمرانی کو ہر صورت یقینی بنایا جائے گا اور کسی بھی جرم میں ملوث افراد کو قانون کے مطابق سزا دی جائے گی، چاہے وہ کسی بھی جماعت یا نظریے سے تعلق رکھتے ہوں۔
