پاکستان شوبز انڈسٹری کے معروف اداکار، گلوکار اور میزبان فخر عالم کے کراچی میں واقع گھر میں چوری کی واردات ہوئی ہے۔ فخر عالم نے اپنے مداحوں اور پیروکاروں کو اس افسوسناک واقعے کی اطلاع ایکس پر دی۔
انہوں نے اپنے پیغام میں لکھا کہ “کراچی میں میرے گھر کو لوٹ لیا گیا ہے، پولیس جائے وقوعہ پر موجود ہے اور تحقیقات جاری ہیں۔” فخر عالم نے یہ بھی کہا کہ “میرے لیے چیزیں اہم نہیں ہیں، مگر ذہنی سکون کی کوئی قیمت نہیں ہوتی اور یہ سب انتہائی پریشان کن ہے۔”
فخر عالم نے اس واقعے کی تفصیل بتاتے ہوئے کہا کہ وہ اُمید کرتے ہیں کہ ملزمان جلد قانون کی گرفت میں آئیں گے۔ ان کا مزید کہنا تھا کہ “ذہنی سکون سب سے اہم چیز ہے اور اس کا اصل نقصان ہوا ہے۔” فخر عالم نے اپنے پیغام میں یہ بھی کہا کہ “براہِ مہربانی تمام افراد چوکنا رہیں۔”
انہوں نے یہ واضح نہیں کیا کہ وہ یا ان کے اہلِ خانہ اس دوران گھر میں موجود تھے یا نہیں۔ اس افسوسناک واقعے کے بعد فخر عالم کے مداحوں کی جانب سے ان کے ساتھ اظہارِ یکجہتی کیا جا رہا ہے اور اس واردات کی شدید مذمت کی جا رہی ہے۔ پولیس نے تحقیقات کا آغاز کر دیا ہے اور امید کی جا رہی ہے کہ ملزمان جلد قانون کے شکنجے میں آئیں گے۔
