وزیرِاعظم شہباز شریف نے یقین دلایا ہے کہ ملک میں جلد شرحِ سود میں مزید کمی کی جائے گی۔ اسلام آباد میں ایک تقریب سے خطاب کرتے ہوئے انہوں نے ملک کی معاشی صورتحال پر اعتماد کا اظہار کیا اور کہا کہ مہنگائی کی شرح 5 فیصد سے بھی کم ہو گئی ہے۔
وزیرِاعظم نے کہا کہ حکومت کی مسلسل محنت رنگ لا رہی ہے، اور اس کے اثرات عوام کو جلد نظر آئیں گے۔ انہوں نے اعلان کیا کہ بجلی کی قیمتوں میں خاطر خواہ کمی لانے کے لیے دن رات کام کیا جا رہا ہے۔ ان کا کہنا تھا کہ بجلی سستی کیے بغیر ترقی ممکن نہیں، اس لیے اس مسئلے کو فوری طور پر حل کرنا ہماری اولین ترجیح ہے۔
شہباز شریف نے مزید کہا کہ ملکی برآمدات اور ترسیلاتِ زر میں مسلسل اضافہ ہو رہا ہے، جس سے معیشت کو مزید استحکام ملے گا۔ انہوں نے کہا کہ پالیسی ریٹ میں کمی کی اُمید ہے، جو معاشی سرگرمیوں کو فروغ دینے میں مددگار ثابت ہوگی۔
انہوں نے عزم ظاہر کیا کہ حکومت سرمایہ کاری کے راستے میں موجود تمام رکاوٹوں کو ختم کر رہی ہے تاکہ ملکی معیشت کو جلد اپنے پیروں پر کھڑا کیا جا سکے۔
وزیرِاعظم نے اس بات پر زور دیا کہ حکومت عوام کو ریلیف فراہم کرنے اور معیشت کو مضبوط بنیادوں پر استوار کرنے کے لیے بھرپور اقدامات کر رہی ہے۔ ان کے مطابق، عوام کو جلد معاشی بہتری کے ثمرات ملنا شروع ہو جائیں گے۔
