امریکی صدر ڈونلڈ ٹرمپ اور برطانیہ کے وزیرِ اعظم کیئر اسٹارمر کے درمیان اہم ٹیلیفونک رابطہ ہوا، جس میں دونوں رہنماؤں نے کئی اہم امور پر تبادلہ خیال کیا اور جلد ملاقات پر اتفاق کیا۔
امریکی میڈیا کے مطابق اس گفتگو میں غزہ کی صورتِ حال، معیشت، اور دیگر دو طرفہ معاملات پر تفصیلی بات چیت کی گئی۔ 10 ڈاؤننگ اسٹریٹ کے ترجمان کے مطابق کیئر اسٹارمر نے غزہ میں جنگ بندی کے لیے ڈونلڈ ٹرمپ کی کوششوں کی تعریف کی اور کہا کہ ان اقدامات نے خطے میں امن کی بحالی کے لیے اہم کردار ادا کیا ہے۔
ڈونلڈ ٹرمپ نے غزہ جنگ بندی کے نتیجے میں برطانوی نژاد اسرائیلی شہری ایملی ڈامار کی رہائی پر خوشی کا اظہار کیا اور اس عمل کو دونوں ممالک کے تعاون کی کامیاب مثال قرار دیا۔ دونوں رہنماؤں نے عالمی معیشت کو درپیش چیلنجز پر بھی گفتگو کی اور دو طرفہ تعلقات کو مزید مضبوط کرنے پر زور دیا۔
بات چیت کے دوران دونوں رہنماؤں نے سیاسی اور اقتصادی شعبوں میں قریبی تعاون کی ضرورت پر زور دیا اور جلد ملاقات پر اتفاق کیا تاکہ ان معاملات پر تفصیلی تبادلہ خیال ممکن ہو سکے۔
یہ ٹیلیفونک رابطہ عالمی سیاست میں امریکہ اور برطانیہ کے درمیان قریبی تعلقات کی اہمیت کو اجاگر کرتا ہے اور دونوں ممالک کے رہنماؤں کے درمیان مضبوط رابطے کی عکاسی کرتا ہے۔
