امریکا کے وزیر خارجہ نے تمام غیر ملکی امدادی پروگراموں کو عارضی طور پر معطل کرنے کا فیصلہ کیا ہے، جس کا اطلاق یوکرین، تائیوان اور اردن کے امدادی پروگراموں پر بھی ہو گا۔ یہ معطلی ابتدائی طور پر نوے 90 دنوں کے لیے ہے، اور صرف اسرائیل اور مصر کو اس سے استثنیٰ حاصل ہوگا۔
امریکی میڈیا کی رپورٹس کے مطابق، امریکی محکمہ خارجہ نے اپنے تمام سفارتی اور قونصل مشنز کو ایک حکم نامہ جاری کیا ہے جس میں انہیں تمام امدادی پروگرام فوری طور پر معطل کرنے کی ہدایت دی گئی ہے۔ وزیر خارجہ مارکو روبیو خود ان پروگراموں کا جائزہ لیں گے اور ان میں ممکنہ تبدیلی یا مکمل طور پر ختم کرنے کا فیصلہ کریں گے۔
امریکی محکمہ خارجہ نے ابھی تک اس خبر کی سرکاری طور پر تصدیق نہیں کی ہے، تاہم میڈیا رپورٹس کے مطابق اس اعلان کے بعد امریکی محکمہ خارجہ کے ملازمین میں اضطراب اور بے چینی پھیل گئی ہے۔ اس اقدام کے نتیجے میں عالمی سطح پر امریکا کی امدادی پالیسی پر سوالات اٹھنا شروع ہو گئے ہیں، خاص طور پر ان ممالک میں جہاں امدادی پروگرام اہمیت رکھتے ہیں۔
اس فیصلے کا عالمی تعلقات اور مختلف ممالک کے ساتھ امریکا کے تعلقات پر دور رس اثرات مرتب ہو سکتے ہیں، اور یہ امریکی حکومت کی مستقبل کی پالیسیوں میں اہم تبدیلیوں کا پیش خیمہ بھی بن سکتا ہے۔
