نیٹو کے سیکریٹری جنرل مارک روٹے نے کہا ہے کہ یوکرین کی جنگ میں امریکا کی معاونت کی ضرورت ہے۔ ڈیووس میں ورلڈ اکنامک فورم کے دوران گفتگو کرتے ہوئے مارک روٹے نے کہا کہ نیٹو کو اپنی دفاعی استعداد بڑھانے کے لیے مزید سرمایہ کاری کرنی چاہیے اور دفاعی صنعت کے پیداوار میں اضافہ کرنا چاہیے۔ ان کا کہنا تھا کہ یوکرین کی مدد کے لیے اخراجات کا بڑا حصہ اٹھانا ضروری ہے۔
مارک روٹے نے اس بات پر زور دیا کہ امریکا سے یوکرین کے لیے سپلائیز جاری رہنی چاہئیں اور اس کے بدلے یورپ امریکا کو ادائیگی کرے گا۔ ان کا یہ بھی کہنا تھا کہ امریکی صدر ڈونلڈ ٹرمپ نے اس ہفتے کے آغاز میں کہا تھا کہ یورپی یونین کو یوکرین کی حمایت میں مزید فعال کردار ادا کرنا ہوگا۔
سیکریٹری جنرل نے مزید کہا کہ نیٹو کو یوکرین کے لیے اپنی حمایت کو مستحکم اور جاری رکھنے کی ضرورت ہے۔ انھوں نے کہا کہ یہ وقت ہے کہ ہم یوکرین کے ساتھ اپنی حمایت کم نہ کریں بلکہ مزید قدم اٹھائیں تاکہ یوکرین کی دفاعی صلاحیتوں کو بڑھایا جا سکے اور اس کی آزادی کے لیے جاری جنگ میں اسے مکمل تعاون فراہم کیا جا سکے۔
مارک روٹے نے کہا کہ نیٹو کی کارروائیوں اور امریکا کی حمایت کی بدولت یوکرین کی حالت بہتر ہو سکتی ہے، لیکن اس کے لیے بین الاقوامی سطح پر مشترکہ کوششوں کی ضرورت ہے۔
