وزیرِ اعظم شہباز شریف نے فیڈرل بورڈ آف ریونیو (ایف بی آر) کے افسران کو نقد انعامات دینے کی اسکیم کا باضابطہ اعلان کر دیا ہے۔ اس اقدام کا مقصد ٹیکس افسران کی کارکردگی میں بہتری اور ان کی حوصلہ افزائی کرنا ہے۔
ذرائع کے مطابق، اس انعامی اسکیم کے لیے حکومت نے 30 ارب روپے مختص کیے ہیں۔ اسکیم کے تحت انعامات صرف انکم ٹیکس اور کسٹمز کے 1800 کیڈر افسران کو دیے جائیں گے۔ اس حوالے سے ایف بی آر نے انکم ٹیکس اور کسٹمز افسران کی آن لائن ویلیوایشن کا نوٹیفکیشن بھی جاری کر دیا ہے۔
ایف بی آر نے بتایا ہے کہ انعامی اسکیم کے تحت افسران کی کارکردگی کا جائزہ لینے کے لیے ایک ریٹنگ اور ریوارڈ سسٹم متعارف کرایا گیا ہے، جس کا 21 جنوری کو ٹیسٹ رن کیا جائے گا۔ اس سسٹم کے مطابق، افسران اپنے سینئرز، ہم پلہ اور جونیئرز کی کارکردگی کی بنیاد پر رینکنگ کریں گے۔
رینکنگ کو پانچ کیٹیگریز اے، بی، سی، ڈی، اور ای میں تقسیم کیا گیا ہے، اور ہر کیٹیگری میں 20 فیصد افسران کو شامل کرنا ضروری ہوگا۔ اے کیٹیگری کے افسران کو کارکردگی کی بنیاد پر 5 بنیادی تنخواہیں بطور انعام دی جائیں گی۔
اس اسکیم کا مقصد ٹیکس افسران کی صلاحیتوں کو بہتر بنانا اور ایف بی آر کے نظام کو مزید شفاف اور مؤثر بنانا ہے۔ حکومت کا یہ اقدام ٹیکس وصولی کے نظام میں اصلاحات کی طرف ایک اہم قدم قرار دیا جا رہا ہے۔
