انٹرنیشنل کرمنل کورٹ کے پراسیکیوٹر کریم خان نے کہا ہے کہ وہ اپنے فیصلے پر پختہ ہیں اور ان کے مطابق اسرائیل جنگی جرائم کی تحقیقات کے حوالے سے سنجیدہ نظر نہیں آ رہا۔ عالمی عدالتِ جرائم کے پراسیکیوٹر نے بین الاقوامی میڈیا سے بات کرتے ہوئے کہا کہ امریکی ایوان نمائندگان میں انٹرنیشنل کرمنل کورٹ (ICC) کے خلاف منظور ہونے والے بل کے باوجود وہ اپنے موقف پر قائم ہیں۔
کریم خان نے اس بات کی وضاحت کی کہ اسرائیلی وزیرِ اعظم نیتن یاہو کی گرفتاری کے لیے نومبر میں جاری کیے گئے وارنٹس ان کے جنگی جرائم سے متعلق ہیں اور ان جرائم کا تعلق انسانیت کے خلاف جرائم سے ہے۔ انہوں نے مزید کہا کہ اسرائیل کی جانب سے ایسی کوئی کوشش نہیں کی گئی جس سے تحقیقات کی کارروائی کو آگے بڑھایا جا سکے۔
آئی سی سی پراسیکیوٹر نے اس بات پر زور دیا کہ ICC ایک ایسی عدالت ہے جسے 125 ممالک نے تسلیم کیا ہے، اور یہ عدالت جنگی جرائم، نسل کشی اور جارحیت کے مقدمات کی سماعت کرتی ہے۔ تاہم، اسرائیل نے اب تک بین الاقوامی جرائم کی عدالت کے دائرہ کار کو تسلیم نہیں کیا ہے۔
دوسری جانب، گزشتہ ہفتے امریکی ایوان نمائندگان نے اس عدالت پر پابندی عائد کرنے کا بل بھی منظور کیا تھا۔
