پاکستان کرکٹ ٹیم کے سابق کپتان شاہد آفریدی نے اپنے خاندان اور والدین کی ذمہ داریوں کے بارے میں گفتگو کرتے ہوئے کہا کہ والدین کی ذمہ داری میں ماں کی طرح باپ کا کردار بھی اہم ہوتا ہے، اور وہ اپنی اولاد کے لیے وقت نکالنا اپنی ذمے داری سمجھتے ہیں۔
ایک پوڈکاسٹ میں بات کرتے ہوئے شاہد آفریدی نے اپنی زندگی میں ہونے والی تبدیلیوں کا ذکر کیا اور کہا کہ شادی اور بیٹیوں کی پیدائش کے بعد ان کی زندگی میں ایک نیا رخ آیا۔ شاہد آفریدی نے اپنے جذبات کا اظہار کرتے ہوئے کہا کہ آج کل کے حالات میں باپ کا کردار ماں سے زیادہ اہم اور ذمے دار ہو گیا ہے۔
انہوں نے اپنی بیٹیوں سے محبت کا ذکر کرتے ہوئے کہا کہ ان کی تمام بیٹیاں ان کی پسندیدہ ہیں۔ جب ان کی پہلی بیٹی پیدا ہوئی، تو انہیں یہ خبر فون پر دی گئی تھی اور وہ آج بھی اس لمحے کو یاد کرتے ہیں جب ان کے چھوٹے بھائی نے انہیں اپنی بیٹی اقصیٰ کو گود میں دیا تھا، اور اس وقت ان کے ہاتھ کانپ رہے تھے۔
شاہد آفریدی نے اپنی پانچ بیٹیوں کے بارے میں بتایا کہ وہ ان کے لیے دنیا کی سب سے بڑی خوشی اور فخر کا باعث ہیں۔ ان کا کہنا تھا کہ بیٹیوں کے ساتھ وقت گزارنا اور ان کی تربیت کرنا ایک والد کی اہم ذمہ داری ہے۔
شاہد آفریدی کی باتیں والدین کے لیے ایک سبق ہیں، جو اپنے بچوں کے ساتھ زیادہ سے زیادہ وقت گزارنے اور ان کی دیکھ بھال کرنے کی اہمیت کو اجاگر کرتی ہیں۔
