پاکستان نے اپنا پہلا مقامی طور پر تیار کردہ الیکٹرو آپٹیکل سیٹلائٹ “ای او ون” خلاء میں بھیج دیا ہے۔ یہ سیٹلائٹ چین کے جی چھوان سیٹلائٹ لانچ سینٹر سے روانہ کیا گیا، جہاں سپارکو کے ماہر سائنسدان بھی موجود تھے۔
سپارکو کے ترجمان کے مطابق، یہ سیٹلائٹ پاکستان کے خلائی پروگرام میں ایک اہم سنگ میل ہے اور اس کا مقصد ملک کی خلائی ٹیکنالوجی کو مزید ترقی دینا ہے۔ ای او ون سیٹلائٹ کو خاص طور پر مختلف اہم شعبوں میں مدد فراہم کرنے کے لیے ڈیزائن کیا گیا ہے۔ ان شعبوں میں ڈیزاسٹر رسپانس، زراعت، شہری منصوبہ بندی اور قدرتی وسائل کی نگرانی شامل ہیں۔
سیٹلائٹ کا مقصد خوراک کی حفاظت، پانی کے انتظام اور قدرتی وسائل کی مؤثر نگرانی میں معاونت فراہم کرنا ہے۔ اس سے پاکستان میں قدرتی آفات کی بہتر پیش گوئی، زراعت کی بہتری، اور شہری منصوبہ بندی میں مدد ملے گی۔ یہ خلائی مشن ملک کی ٹیکنالوجیکل ایج کو بھی مزید مستحکم کرے گا اور عالمی سطح پر پاکستان کے خلائی پروگرام کو ایک نیا عروج دے گا۔
سپارکو کے ترجمان نے اس سیٹلائٹ کی کامیابی کو پاکستان کے لیے ایک تاریخی لمحہ قرار دیتے ہوئے کہا کہ یہ مشن نہ صرف خلائی پروگرام کی کامیابی کا غماز ہے بلکہ ملک کے مستقبل کے ترقیاتی منصوبوں کے لیے ایک اہم قدم ثابت ہوگا۔
