اینٹی نارکوٹکس فورس (اے این ایف) نے ملک بھر میں انسدادِ منشیات کے خلاف مختلف کارروائیوں کے دوران اہم کامیابیاں حاصل کیں۔ ترجمان اے این ایف کے مطابق مختلف شہروں میں کی گئی 10 کارروائیوں میں 8 ملزمان کو گرفتار کیا گیا اور 174 کلو گرام منشیات برآمد کی گئی۔
ترجمان کے مطابق راولپنڈی میں سروس روڈ کے قریب کارروائی کے دوران دو ملزمان سے ایک کلو چرس برآمد کی گئی۔ اسی طرح، کوریئر آفس میں برطانیہ سے آئے دو پارسلز سے 116 گرام ویڈ برآمد کیا گیا۔
کراچی کے علاقے سہراب گوٹھ میں ہوٹل کے قریب ایک ملزم سے 9.6 کلو گرام چرس برآمد کی گئی۔ اسلام آباد کے قریب ایک اور کارروائی میں ایک ملزم سے 5 کلو آئس، 1.2 کلو چرس، اور 500 گرام ہیروئن برآمد ہوئی۔
جی ٹی روڈ گجرات کے قریب اے این ایف نے ایک گاڑی سے 4.8 کلو افیون برآمد کرتے ہوئے دو ملزمان کو گرفتار کیا۔ جامشورو میں کارروائی کے دوران ایک شخص سے 2 کلو چرس اور 1.5 کلو آئس ضبط کی گئی۔ مزید برآں، جہلم کے قریب کی گئی کارروائی میں ایک ملزم سے 1.1 کلو ہیروئن اور 1 کلو آئس برآمد کی گئی۔
ترجمان اے این ایف کے مطابق گرفتار ملزمان کے خلاف قانونی کارروائی شروع کر دی گئی ہے۔ ان کارروائیوں کا مقصد ملک کو منشیات سے پاک کرنا اور جرائم کا خاتمہ ہے۔ اے این ایف منشیات فروشوں کے خلاف اپنی کارروائیاں جاری رکھے ہوئے ہے اور معاشرے سے اس لعنت کو ختم کرنے کے لیے پُرعزم ہے۔
