امریکی کمپنی ٹیسلا کے بانی ایلون مسک کی ایک ویڈیو سوشل میڈیا پر وائرل ہو رہی ہے جس میں وہ فلسطینیوں کی نسل کشی کی حمایت کرتے ہوئے نظر آ رہے ہیں۔ اس ویڈیو میں ایلون مسک اسرائیل کے تحفظ کے لیے تین اہم اقدامات پر زور دے رہے ہیں۔ انہوں نے کہا کہ “ہمارے پاس اسرائیل کی ریاست کو ختم کرنے کے خواہشمندوں کا خاتمہ کرنے کے علاوہ کوئی چارہ نہیں ہے۔”
ایلون مسک کا کہنا تھا کہ حماس کے خیالات کے بارے میں سب جانتے ہیں، اور اس تنظیم کا خاتمہ ضروری ہے۔ انہوں نے مزید کہا کہ فلسطینی بچوں کے ذہنوں میں بچپن سے ہی امریکا اور اسرائیل کے بارے میں نفرت پھیلائی جاتی ہے، جسے روکنا ضروری ہے۔ مسک نے تیسری اہم بات یہ کی کہ غزہ میں معاشی ترقی اور استحکام لانا ضروری ہے، اور یہ کام بہت مشکل ہے لیکن خطے میں امن کے قیام کے لیے ضروری ہے۔
اس کے علاوہ، ایلون مسک نے جرمنی اور جاپان کی مثال دیتے ہوئے کہا کہ دوسری جنگ عظیم کے بعد امریکا نے مارشل پلان کے تحت ان دونوں ممالک کی تعمیر نو کے لیے مالی امداد فراہم کی۔ ان کا خیال تھا کہ غزہ کے ساتھ بھی ایسا ہی کرنا چاہیے تاکہ وہاں بھی استحکام اور امن قائم ہو۔
مسک کی اس ویڈیو پر سوشل میڈیا صارفین کی جانب سے شدید تنقید کی جا رہی ہے۔ کئی افراد نے ایلون مسک کی باتوں کو جھوٹ قرار دیا اور کہا کہ وہ فلسطینیوں کے بارے میں گمراہ کن معلومات دے رہے ہیں۔ ایک صارف نے ایلون مسک سے سوال کیا کہ “اسرائیل میں بچوں کو فلسطینیوں سے نفرت کرنا سکھانے کے بارے میں آپ کا کیا خیال ہے؟” جبکہ ایک اور صارف نے کہا کہ “ٹیسلا کے بانی کے دماغ میں شیطانی ریاست کی حمایت کے لیے بیمار ذہنیت پائی جاتی ہے۔”
اس ویڈیو کے وائرل ہونے کے بعد ایلون مسک کی باتوں پر شدید ردعمل دیکھنے کو مل رہا ہے اور سوشل میڈیا پر اس پر بحث جاری ہے۔
