تبت کے دوسرے سب سے بڑے اور مقدس شہر شگاتسے کے قریب 7.1 شدت کے زلزلے کے نتیجے میں 53 افراد کی ہلاکت اور 62 افراد کے زخمی ہونے کی تصدیق ہو چکی ہے۔ یہ زلزلہ منگل کی صبح مقامی وقت کے مطابق 9:05 پر آیا۔ چینی اور امریکی زلزلہ مانیٹرنگ گروپوں کے مطابق، زلزلے کی شدت چین کے زلزلہ نیٹ ورک سینٹر کے مطابق 6.8 ریکارڈ کی گئی، جب کہ امریکی جیولوجیکل سروے نے اسے 7.1 شدت کا قرار دیا۔ اس قدرتی آفات کے بعد کئی آفٹر شاکس بھی محسوس ہوئے، جن میں سب سے طاقتور جھٹکے 4.4 شدت کے تھے۔
چین کی سرکاری خبر رساں ایجنسی ژنہوا کے مطابق، شگاتسے اور اس کے قرب و جوار میں 9 افراد کی ہلاکت ہوئی اور کئی عمارتیں منہدم ہو گئیں۔ مقامی میڈیا نے بھی درجنوں افراد کی ہلاکت کی اطلاع دی ہے۔ الجزیرہ کی رپورٹر نے بیجنگ سے رپورٹنگ کرتے ہوئے بتایا کہ متاثرہ علاقوں سے آنے والی تصاویر میں تباہ شدہ عمارتیں اور مکانات واضح طور پر نظر آ رہے ہیں۔
زلزلے کے جھٹکے تبت کے علاوہ نیپال اور بھارت کے بعض حصوں میں بھی محسوس کیے گئے۔ یہ خطہ فالٹ لائن پر واقع ہے، جہاں زلزلے عام ہیں۔ متاثرہ علاقے دور دراز پہاڑی دیہات ہیں، جن تک رسائی مشکل ہے اور سردیوں کی شدت نے وہاں پہنچنے کو مزید دشوار بنا دیا ہے۔
شگاتسے شہر تبت کے مقدس ترین شہروں میں شمار کیا جاتا ہے اور بدھ مت کے اہم رہنما پنچن لامہ کی نشست بھی یہاں ہے۔ اس سانحے نے نہ صرف تبت بلکہ پورے علاقے میں غم کی لہر دوڑائی ہے۔
