بھارت کے معروف فاسٹ باؤلر جسپریت بمراہ نے ٹیسٹ کرکٹ میں ایک نیا سنگ میل عبور کیا ہے۔ میلبرن کرکٹ گراؤنڈ پر آسٹریلیا کے خلاف کھیلے گئے میچ میں، بمراہ نے کینگرو بلے باز ٹریوس ہیڈ کو پویلین کی راہ دکھا کر اپنی 200 ویں وکٹ حاصل کی، اور اس کے ساتھ ہی وہ ٹیسٹ کرکٹ کے عظیم ترین فاسٹ باؤلرز میں شامل ہوگئے۔ کرک انفو کی رپورٹ کے مطابق، بمراہ نے یہ کارنامہ اپنے 44 ویں ٹیسٹ میچ میں انجام دیا۔
200 سے زیادہ ٹیسٹ وکٹیں حاصل کرنے والے 85 باؤلرز میں سے صرف 12 ایسے ہیں جنہوں نے بمراہ سے کم میچز میں یہ سنگ میل عبور کیا۔ بمراہ نے اس سنگ میل کو بہترین بولنگ اوسط کے ساتھ حاصل کیا ہے، ان کی بولنگ اوسط 19.56 رنز فی وکٹ ہے، جو انہیں اس فہرست میں سب سے اوپر لے آتی ہے۔ بمراہ وہ باؤلر ہیں جنہوں نے اپنی پہلی 200 وکٹوں کے حصول میں 4 ہزار سے کم رنز دیے، جو ایک منفرد ریکارڈ ہے۔
بمراہ کا اسٹرائیک ریٹ 42.4 ہے، یعنی ہر 7 اوورز میں ایک وکٹ حاصل کرتے ہیں، اور وہ صرف وقار یونس، ڈیل اسٹین اور کاگیسو ربادا سے پیچھے ہیں۔ ان فاسٹ باؤلرز کے ساتھ بمراہ کا موازنہ کیا جا رہا ہے جو نئی اور پرانی گیند سے شاندار باؤلنگ کرنے کی صلاحیت رکھتے ہیں۔
جنوبی افریقہ، انگلینڈ، نیوزی لینڈ اور آسٹریلیا جیسے اہم کرکٹ میدانوں میں بمراہ کا ریکارڈ بھی شاندار رہا ہے، جہاں وہ بھارت کے کسی بھی فاسٹ باؤلر سے زیادہ وکٹیں حاصل کرنے والے کھلاڑی ہیں۔ بمراہ نے اپنے کیریئر میں 64 وکٹیں ٹاپ تھری بلے بازوں کی لی ہیں، اور انہوں نے 50 بار مخالف اوپنرز کو آؤٹ کیا۔ ان کی ٹاپ فور وکٹوں کا تناسب عالمی سطح پر ساتواں اور بھارت کا سب سے بہترین تناسب ہے۔
یہ کامیابی بمراہ کے لیے ایک بڑا اعزاز ہے اور بھارتی کرکٹ کے لیے ایک سنگ میل کی حیثیت رکھتی ہے۔
