پاکستان کرکٹ ٹیم کی جنوبی افریقا کے خلاف پہلے ٹیسٹ میں 2 وکٹوں کی شکست نے بھارت کی ورلڈ ٹیسٹ چیمپئن شپ فائنل تک رسائی کے امکانات کو مزید پیچیدہ بنا دیا ہے۔ اس شکست کے بعد پاکستان ایک بار پھر ٹیسٹ چیمپئن شپ کے فائنل میں جگہ بنانے میں ناکام رہا، جبکہ جنوبی افریقا نے شاندار کارکردگی دکھاتے ہوئے تیسری ورلڈ ٹیسٹ چیمپئن شپ کے فائنل کے لیے کوالیفائی کرلیا۔
سوشل میڈیا پر بھارتی شائقین نے پاکستان کی شکست پر تبصرہ کرتے ہوئے الزام لگایا کہ پاکستان جان بوجھ کر جنوبی افریقا سے ہارا تاکہ بھارت کو فائنل میں پہنچنے سے روکا جا سکے۔
اب بھارت کے لیے فائنل تک پہنچنے کا راستہ خاصا دشوار ہو گیا ہے۔ بھارتی ٹیم کو آسٹریلیا کے خلاف دونوں ٹیسٹ میچز میں کامیابی حاصل کرنا ہوگی۔ اگر وہ ایک میچ جیتتے ہیں اور دوسرا ڈرا کرتے ہیں تو انہیں سری لنکا کی آسٹریلیا کے خلاف دو میچز کی سیریز میں ایک صفر کی فتح پر انحصار کرنا ہوگا۔
ورلڈ ٹیسٹ چیمپئن شپ کا فائنل 11 جون 2025 کو انگلینڈ کے تاریخی لارڈز گراؤنڈ میں کھیلا جائے گا۔ جنوبی افریقا نے اپنی جگہ تو یقینی بنا لی ہے، تاہم ان کے مدمقابل ٹیم کا فیصلہ آسٹریلیا، بھارت، اور سری لنکا کی آئندہ کارکردگی پر منحصر ہوگا۔
یہ صورتحال بھارت کے لیے بڑا چیلنج ہے اور کرکٹ کے مداحوں کی نظریں اب ان اہم میچز پر مرکوز ہیں۔
