پاکستان اور کینیا کے درمیان دواسازی سمیت مختلف شعبوں میں تجارتی تعلقات کو مضبوط بنانے کے امکانات پر بات چیت ہوئی ہے۔ دونوں ممالک نے باہمی تجارت کو فروغ دینے اور سرمایہ کاری کے مواقع تلاش کرنے کے لیے اہم اقدامات پر غور کیا ہے۔
سرمایہ کاری کے فروغ کے لیے ایس آئی ایف سی کی کارگر پالیسیوں کے تحت بین الاقوامی تجارتی تعلقات کو وسعت دینے کی کوششیں جاری ہیں۔ اس تناظر میں، پاکستان اور کینیا کے درمیان فری ٹریڈ ایگریمنٹ (ایف ٹی اے) سمیت مختلف شعبوں میں شراکت داری پر تبادلہ خیال کیا گیا ہے۔ ایف ٹی اے دونوں ممالک کے لیے اقتصادی ترقی، عالمی منڈیوں میں مسابقت، اور تجارتی تعلقات کو مضبوط بنانے کا ایک اہم ذریعہ ہے، جس کے تحت قیمتوں میں کمی، صنعتوں کی ترقی، اور کاروباری مواقع میں اضافہ ممکن ہوگا۔
پاکستان کی جانب سے کینیا کو پنک سالٹ، ماربل، اور سیمنٹ جیسی مصنوعات برآمد کرنے کے امکانات پر خاص زور دیا جا رہا ہے۔ اس کے علاوہ، دواسازی کے شعبے میں بھی دوطرفہ تجارت کو بڑھانے پر توجہ دی جا رہی ہے، جس سے دونوں ممالک کو فائدہ ہوگا۔
وفاقی وزیر برائے تجارت جام کمال خان نے پاکستان کی جغرافیائی اہمیت کو اجاگر کرتے ہوئے کہا کہ ملک وسطی ایشیا اور مشرقی افریقا کے درمیان تجارتی روابط کا اہم مرکز بن سکتا ہے۔ انہوں نے حکومتی کوششوں اور ایس آئی ایف سی کی پالیسیوں کو غیر ملکی سرمایہ کاری کے فروغ اور اقتصادی ترقی کے لیے اہم قرار دیا۔
یہ پیش رفت پاکستان اور کینیا کے درمیان تجارتی تعاون کو نئے افق پر لے جانے کی امید پیدا کرتی ہے۔
