“کوہلی کو بزدل، مسخرہ اور رونے والا بچہ کہنے پر بھارتی میڈیا کی سخت تنقید”

آسٹریلوی بیٹر سیم کونسٹاس کو کندھا مارنے کے معاملے پر بھارتی کرکٹر ویرات کوہلی کو آسٹریلوی میڈیا نے مسخرہ قرار دے دیا۔

باکسنگ ڈے ٹیسٹ کے پہلے دن ویرات کوہلی کی سیم کونسٹاس کے ساتھ جھگڑے اور چھیڑ چھاڑ کے بعد آسٹریلوی میڈیا نے کوہلی پر تنقید کی۔

آئی سی سی نے اس معاملے پر ایکشن لیتے ہوئے ویرات کوہلی کو میچ فیس کا 20 فیصد جرمانہ عائد کیا اور ایک ڈی میرٹ پوائنٹ بھی دیا۔ آسٹریلوی اخبار کی ہیڈ لائن جس میں کوہلی کو مسخرہ کہا گیا، سوشل میڈیا پر وائرل ہو گئی۔ تاہم بھارتی میڈیا نے کوہلی کو مسخرہ کہنے کو ان کی بے عزتی قرار دیا۔

آسٹریلوی میڈیا ویرات کوہلی کی سزا سے خوش نہیں تھا اور کم از کم ایک میچ کی معطلی کا مطالبہ کیا، ساتھ ہی انہیں بزدل اور رونے والا بچہ بھی کہا۔

دوسری طرف سابق آسٹریلوی کرکٹرز نے ویرات کوہلی کو دی جانے والی سزا کو سخت قرار نہیں دیا۔

یاد رہے کہ باکسنگ ڈے ٹیسٹ کے پہلے دن ویرات کوہلی نے سیم کونسٹاس کو کندھا مارا تھا، جس کی ویڈیو بعد میں سوشل میڈیا پر وائرل ہو گئی تھی۔