پاکستان سافٹ ویئر ہاؤسز ایسوسی ایشن (پاشا) کے چیئرمین سجاد مصطفیٰ نے کہا ہے کہ امید ہے کہ نئی کیبلز کی تنصیب کے بعد پاکستان میں انٹرنیٹ کے مسائل ہمیشہ کے لیے حل ہو جائیں گے۔ انہوں نے جیو نیوز کے پروگرام “جیو پاکستان” میں گفتگو کرتے ہوئے کہا کہ کچھ ہفتوں قبل ملک کے مختلف علاقوں میں انٹرنیٹ کے مسائل سامنے آئے تھے، جنہیں اب حل کر لیا گیا ہے۔
سجاد مصطفیٰ نے مزید کہا کہ اگلے سال تین سے چار بڑی کیبلز اور فائیو جی ٹیکنالوجی کی تنصیب کے بعد انٹرنیٹ کے مسائل مکمل طور پر حل ہو جائیں گے۔ انہوں نے یہ بھی بتایا کہ نئی کیبل میں سے دو کا لنک تو قائم ہو چکا ہے، لیکن وہ ابھی فعال نہیں ہو پائیں۔
پاکستان میں انٹرنیٹ کی اسپیڈ بڑھانے کے لیے ایک اہم قدم کے طور پر، جدید انٹرنیٹ کیبل افریقہ سے پاکستان کے ساتھ منسلک کی جا رہی ہے۔ اس کیبل کی لمبائی تقریباً 45,000 کلومیٹر ہے، جو آج پاکستان سے منسلک ہو گی۔ آئی ٹی ماہرین کا کہنا ہے کہ یہ کیبل 180 ٹیرا بائٹس فی سیکنڈ کی گنجائش فراہم کرے گی، جس سے نہ صرف انٹرنیٹ کی اسپیڈ میں اضافہ ہوگا بلکہ سوشل میڈیا ایپس سمیت دیگر آن لائن خدمات کی کارکردگی میں بھی بہتری آئے گی۔
اس منصوبے سے پاکستان میں انٹرنیٹ کی اسپیڈ میں قابل ذکر اضافہ ہونے کی توقع ہے، جو نہ صرف صارفین کے لیے فائدہ مند ہوگا بلکہ ملک کی اقتصادی ترقی اور ڈیجیٹل انفراسٹرکچر کو بھی مضبوط کرے گا۔
