آئی فون صارفین کے لیے ایک اہم سیکیورٹی انتباہ جاری کیا گیا ہے، جس میں ماہرین نے ڈیٹا کی حفاظت یقینی بنانے کے لیے فوری اقدامات کی ہدایت کی ہے۔ ماہرین نے زور دیا ہے کہ صارفین اپنے فون کی سیٹنگز کا جائزہ لیں اور سافٹ ویئر کو فوری طور پر اپ ڈیٹ کریں تاکہ ممکنہ خطرات سے بچا جا سکے۔
تازہ ترین اطلاعات کے مطابق، آئی فونز پر حال ہی میں آئی او ایس 18 اپ ڈیٹ کے بعد کچھ صارفین کو اپنی ہوم اسکرین پر “پاسورڈز” نامی ایک ایپ نظر آئی ہے، جو خود بخود ڈاؤن لوڈ ہو سکتی ہے۔ ماہرین کا کہنا ہے کہ یہ ایپ فون میں محفوظ تمام پاسورڈز تک رسائی حاصل کر سکتی ہے، جس سے صارفین کے ڈیٹا کے افشا ہونے کا خدشہ بڑھ جاتا ہے۔
ڈیویلپر اور سیکیورٹی ریسرچر، ٹامی میسک، نے خبردار کیا ہے کہ یہ ایپ اَن اِنکرپٹڈ ایچ ٹی ٹی پی پروٹوکول استعمال کرتی ہے۔ اس کا مطلب یہ ہے کہ اگر صارفین اس ایپ کے ذریعے کسی ویب سائٹ پر لاگ اِن کرتے ہیں تو ان کا ڈیٹا ہیکرز کے ہاتھ لگ سکتا ہے۔
ایپل کی جانب سے اس مسئلے کو حل کرنے کے لیے فوری اقدامات کیے گئے ہیں، لیکن ماہرین کا کہنا ہے کہ صارفین کو اپنے آئی فونز کو تازہ ترین اپ ڈیٹ پر منتقل کرنا چاہیے تاکہ ڈیٹا کی مکمل حفاظت یقینی بنائی جا سکے۔
ماہرین نے صارفین کو مشورہ دیا ہے کہ وہ کسی بھی غیر معمولی ایپ پر کلک کرنے سے گریز کریں اور اپنے فون کے سیکیورٹی فیچرز کو فعال رکھیں۔ ڈیٹا کے تحفظ کے لیے یہ اپ ڈیٹ نہایت ضروری قرار دی گئی ہے۔
