وفاقی وزیر برائے توانائی اویس لغاری نے کہا ہے کہ بجلی صارفین کو پری پیڈ میٹرز فراہم کرنا ضروری ہے۔
میپکو ہیڈ کوارٹر میں میڈیا سے گفتگو کرتے ہوئے، اویس لغاری نے کہا کہ ہم نئے بورڈز کے ذریعے کمپنی میں صارفین کو بہتر خدمات فراہم کریں گے، اور عام شہریوں کی کالز کا جلد جواب دیا جائے گا۔
انہوں نے بتایا کہ ڈسکوز کو یہ اختیار دیا جائے گا کہ وہ عملے کو رکھیں یا نکالیں، لیکن ہمیں نتائج کی ضرورت ہے۔ پنجاب حکومت کی جانب سے دیے گئے ریلیف پر بجلی کمپنیوں کو سخت ہدایات دی گئی ہیں کہ کسی بھی یونٹ کی غلطی برداشت نہیں کی جائے گی۔
ان کا کہنا تھا کہ بجلی کی چوری ریاست اور عوام کے لیے ناقابل برداشت ہے، اور کوشش کی جا رہی ہے کہ اس سال چوری کے نقصانات کم ہوں۔ میپکو ریجن میں 15.6 فیصد بجلی چوری کا ہدف ختم کرنا ہے، اور بجلی چوری کو روکنے پر کمپنیوں کو مکمل اختیار دیا جائے گا۔
اویس لغاری نے مزید کہا کہ حکومت پنجاب نے 45 ارب روپے سے 200 سے 500 یونٹ صارفین کو ریلیف فراہم کیا ہے، جسے عوام تک پہنچایا جائے گا۔ شرح سود کم ہونے اور روپیہ مستحکم ہونے سے کیپسٹی پیمنٹ پر فرق پڑے گا، جس سے ایک سال میں بجلی کی قیمتوں میں کمی متوقع ہے۔
