محکمہ موسمیات نے بتایا ہے کہ مون سون ہواؤں کا سلسلہ آج سے سندھ میں داخل ہوگا اور ملک میں مون سون کا اسپیل 25 اگست تک جاری رہنے کا امکان ہے۔
محکمہ موسمیات کے مطابق، 19 اگست تک کراچی، گھوٹکی، میرپورخاص، عمرکوٹ، سانگھڑ، ٹھٹہ اور سکھر سمیت سندھ کے مختلف شہروں میں گرج چمک کے ساتھ بارش ہو سکتی ہے۔
دوسری جانب، گوجرانوالا، حافظ آباد اور چنیوٹ میں تیز بارش کی پیش گوئی کی گئی ہے، جس کے پیش نظر این ڈی ایم اے نے پنجاب کے بڑے شہروں میں اربن فلڈنگ کا خدشہ ظاہر کیا ہے۔
وزیراعظم نے این ڈی ایم اے، پی ڈی ایم ایز اور دیگر متعلقہ اداروں کو مون سون کے نئے اسپیل کے دوران ہائی الرٹ رہنے کی ہدایت دی ہے۔
وزیراعظم نے کہا کہ وہ 25 اگست تک مون سون کے متوقع شدید اسپیل کی نگرانی خود کر رہے ہیں اور ہنگامی صورتحال میں لوگوں کے انخلا اور نکاسی آب کی تیاری کو یقینی بنانے کی ہدایت دی ہے۔
