مون سون بارشوں کی وجہ سے دریائے چناب اور راوی سے منسلک ندی نالوں میں سیلاب کا خدشہ ہے۔
صوبائی ڈیزاسٹر مینجمنٹ اتھارٹی (پی ڈی ایم اے) کے مطابق، اس سال مون سون سیزن کے دوران آسمانی بجلی گرنے اور بوسیدہ عمارتوں کے گرنے کے باعث 55 شہری جاں بحق اور 145 زخمی ہوئے ہیں۔
ترجمان پی ڈی ایم اے نے بتایا کہ مون سون بارشوں کے باعث دریاؤں، ڈیموں اور ندی نالوں میں پانی کی سطح میں اضافہ ہو رہا ہے، اور 13 اگست تک دریائے چناب اور راوی سے منسلک ندی نالوں میں سیلاب کا خدشہ ہے۔
ترجمان کے مطابق، دریائے سندھ میں چشمہ اور تونسہ کے مقام پر درمیانے درجے کا سیلاب ہے جبکہ تربیلا اور کالا باغ کے مقام پر نچلے درجے کی سیلابی صورتحال ہے۔ تاہم، ممکنہ سیلاب کے پیش نظر تمام تر انتظامات مکمل کر لیے گئے ہیں۔
