پاکستان سپر لیگ (پی ایس ایل) 2025 کے 10ویں ایڈیشن کی افتتاحی تقریب کا انعقاد راولپنڈی کرکٹ اسٹیڈیم میں کیا جائے گا، جہاں شائقین کو کرکٹ کے ساتھ تفریح کا زبردست امتزاج دیکھنے کو ملے گا۔ پاکستان کرکٹ بورڈ (پی سی بی) کی جانب سے جاری کردہ اعلامیے کے مطابق، افتتاحی تقریب 11 اپریل بروز جمعہ شام 7 بجے شروع ہوگی، جس میں ملک کے معروف گلوکار اور فنکار اپنی پرفارمنس سے تقریب کو یادگار بنائیں گے۔
تقریب کے فوری بعد، دفاعی چیمپئن اسلام آباد یونائیٹڈ اور لاہور قلندرز کے درمیان افتتاحی میچ راولپنڈی کرکٹ اسٹیڈیم میں رات 8:30 بجے شروع ہوگا، جس سے ایونٹ کا باضابطہ آغاز ہوگا۔ اس بار پی ایس ایل کے میچز چار مختلف شہروں میں کھیلے جائیں گے، جن میں کراچی کا نیشنل بینک اسٹیڈیم، لاہور کا قذافی اسٹیڈیم، ملتان کرکٹ اسٹیڈیم، اور راولپنڈی کرکٹ اسٹیڈیم شامل ہیں۔
افتتاحی تقریب میں صوفی میوزک کی ملکہ عابدہ پروین اپنی روحانی آواز کا جادو جگائیں گی، جبکہ نوجوان فنکار بھی شاندار پرفارمنس پیش کریں گے۔ اس کے علاوہ، پی ایس ایل 10 کے انتھم میں شامل گلوکاروں — علی ظفر، ابرار الحق، نتاشا بیگ اور طلحہ انجم — کی پرفارمنس شائقین کے جوش و خروش میں مزید اضافہ کرے گی۔
تقریب کا ایک اور نمایاں پہلو شاندار آتش بازی کا مظاہرہ ہوگا، جو اسٹیڈیم کو روشنیوں سے جگمگا دے گا۔ پی ایس ایل 10 کا آغاز نہ صرف کرکٹ کے شوقین افراد بلکہ موسیقی اور تفریح کے دلدادہ شائقین کے لیے بھی ایک یادگار لمحہ بننے جا رہا ہے۔
