پنجاب میں محکمہ انسداد دہشت گردی (سی ٹی ڈی) نے مختلف شہروں میں کامیاب کارروائیاں کرتے ہوئے 15 مبینہ دہشت گردوں کو گرفتار کرلیا۔ سی ٹی ڈی کے ترجمان کے مطابق گرفتار افراد کے قبضے سے دھماکا خیز مواد اور ڈیٹونیٹرز بھی برآمد کیے گئے ہیں، جو ممکنہ طور پر کسی تخریبی کارروائی میں استعمال کیے جا سکتے تھے۔
یہ کارروائیاں لاہور، سیالکوٹ، گجرات، اٹک، سرگودھا، بہاولپور، جھنگ، میانوالی، چنیوٹ اور اٹک میں کی گئیں، جہاں سیکیورٹی اداروں نے خفیہ اطلاعات کی بنیاد پر دہشت گردوں کے خلاف آپریشن کیے۔ سی ٹی ڈی کا کہنا ہے کہ لاہور سے ایک انتہائی خطرناک دہشت گرد کو بھی گرفتار کیا گیا ہے، جس کا تعلق شمالی وزیرستان سے بتایا جا رہا ہے اور وہ فتنہ الخوارج نامی تنظیم سے منسلک ہے۔
گرفتار دہشت گردوں سے تحقیقات کا عمل جاری ہے اور ان کے دیگر نیٹ ورکس سے متعلق بھی معلومات حاصل کی جا رہی ہیں۔ حکام کا کہنا ہے کہ ابتدائی تحقیقات میں یہ بات سامنے آئی ہے کہ گرفتار ملزمان پنجاب میں دہشت گردی کی مختلف کارروائیوں کی منصوبہ بندی کر رہے تھے۔
سیکیورٹی اداروں کے مطابق دہشت گردی کے خلاف یہ آپریشنز مستقبل میں بھی جاری رہیں گے تاکہ ملک کو کسی بھی ممکنہ خطرے سے محفوظ رکھا جا سکے۔ عوام کو بھی ہدایت کی گئی ہے کہ وہ مشکوک سرگرمیوں کی اطلاع فوری طور پر قانون نافذ کرنے والے اداروں کو دیں تاکہ دہشت گرد عناصر کے خلاف بروقت کارروائی ممکن ہو سکے۔
