خیبرپختونخوا حکومت کے ترجمان سرفراز مغل نے انکشاف کیا ہے کہ وزیرِ اعلیٰ علی امین گنڈاپور نے تحریک انصاف کے کل ہونے والے جلسے کے لیے 50 لاکھ روپے فراہم کیے ہیں۔ انہوں نے کہا کہ وزیرِ اعلیٰ اپنی جماعت کے جلسوں اور احتجاجی سرگرمیوں کی بھرپور حمایت کر رہے ہیں اور اس حوالے سے مالی معاونت بھی فراہم کر رہے ہیں۔
ترجمان خیبرپختونخوا حکومت نے میڈیا سے گفتگو کرتے ہوئے بتایا کہ علی امین گنڈاپور نے تحریک انصاف کے احتجاج اور جلسوں کے اخراجات کے لیے اب تک 50 کروڑ روپے سے زائد خرچ کیے ہیں۔ ان کے مطابق، احتجاج کے دوران جلائی گئی مشینری اور دیگر نقصانات کی تلافی بھی وزیرِ اعلیٰ نے اپنی ذاتی رقم سے کی ہے۔
ترجمان کا مزید کہنا تھا کہ پی ٹی آئی کارکنان کل ہونے والے جلسے میں بڑی تعداد میں شرکت کریں گے۔ انہوں نے بتایا کہ ڈی آئی خان ریجن سے ایک بڑا قافلہ عمر امین کی قیادت میں جلسہ گاہ کی طرف روانہ ہوگا۔ اس قافلے میں شامل سیکڑوں گاڑیوں کے کرایوں کی ادائیگی پہلے ہی کر دی گئی ہے تاکہ کارکنان کو کسی قسم کی مشکلات کا سامنا نہ ہو۔
انہوں نے کہا کہ علی امین گنڈاپور نہ صرف خیبرپختونخوا میں حکومتی امور چلا رہے ہیں بلکہ پارٹی کے استحکام اور اس کی سرگرمیوں کے لیے بھی متحرک کردار ادا کر رہے ہیں۔ ان کا مزید کہنا تھا کہ وزیرِ اعلیٰ پارٹی کے لیے اسی طرح کام کرتے رہیں گے اور پی ٹی آئی کے جلسے اور احتجاجی مہمات کی حمایت جاری رکھیں گے۔
