ویانا: چیئرمین سینیٹ سید یوسف رضا گیلانی نے آسٹریا کے نیشنل کونسل کے صدر ایچ ای والٹر روزن کرانز سے ملاقات کی، جس میں دونوں ممالک کے درمیان پارلیمانی اور اقتصادی تعلقات کو مزید مضبوط بنانے پر تبادلہ خیال کیا گیا۔ اس اہم ملاقات میں وفاقی وزیر سید نوید قمر، مشیر برائے قانون ملک محمد احمد خان اور سید اویس قادر شاہ بھی موجود تھے۔
ملاقات کے دوران چیئرمین سینیٹ نے صدر والٹر روزن کرانز کو باضابطہ طور پر پاکستان کے دورے کی دعوت دی۔ انہوں نے آسٹریا کی جانب سے اقوام متحدہ کی سلامتی کونسل میں پاکستان کی حمایت پر شکریہ ادا کیا اور اسے دونوں ممالک کے درمیان دوستانہ تعلقات کا مظہر قرار دیا۔
دونوں رہنماؤں نے اقتصادی اور تجارتی تعلقات میں مزید بہتری کے عزم کا اظہار کیا اور باہمی تعاون کو فروغ دینے کے لیے مختلف شعبوں میں شراکت داری پر اتفاق کیا۔ ملاقات میں اعلیٰ تعلیم، جدید ٹیکنالوجی، قابل تجدید توانائی اور صنعتی ترقی کے لیے دوطرفہ تعاون بڑھانے کے عزم کا اعادہ بھی کیا گیا۔
مزید برآں، بین الپارلیمانی تعاون کو فروغ دینے اور پالیسیوں کے تبادلے کے لیے پارلیمانی سفارتکاری کو مزید فعال بنانے پر بھی تفصیلی گفتگو ہوئی۔ اس موقع پر دونوں فریقین نے اس بات پر اتفاق کیا کہ پارلیمانی روابط کو مزید مستحکم کرکے دوطرفہ تعلقات کو مزید فروغ دیا جا سکتا ہے۔
یہ ملاقات پاکستان اور آسٹریا کے درمیان دوستی کو مزید گہرا کرنے اور مستقبل میں مشترکہ ترقیاتی منصوبوں کے آغاز کی راہ ہموار کرنے کے حوالے سے ایک اہم پیش رفت قرار دی جا رہی ہے۔
