کینیڈا کے پارلیمنٹ کے رکن چارلی اینگس نے ایلون مسک اور ان کے سوشل میڈیا پلیٹ فارم ایکس (سابقہ ٹویٹر) کے بارے میں الیکشنز کینیڈا سے تحقیقات کرنے کی درخواست کی ہے۔ انہوں نے کینیڈا کے اگلے وفاقی انتخابات میں ایلون مسک کی ممکنہ مداخلت کے حوالے سے گہری تشویش کا اظہار کیا ہے۔
چارلی اینگس نے چیف الیکٹورل آفیسر اسٹیفین پیروولٹ کو اپنے دو صفحات پر مشتمل خط میں ایلون مسک کے ماضی میں مختلف ممالک کے انتخابات میں کردار ادا کرنے پر تبصرہ کیا۔ انہوں نے کہا کہ مسک نے کئی مواقع پر قدامت پسند امیدواروں کو مالی معاونت فراہم کی اور سوشل میڈیا پلیٹ فارم ایکس (سابقہ ٹویٹر) کا استعمال اپنے پسندیدہ امیدواروں کے سیاسی پیغامات کو فروغ دینے کے لیے کیا۔
مزید برآں، اینگس نے خط میں الزام لگایا کہ ایلون مسک نے دائیں بازو کے پاپولسٹ رہنماؤں کے ساتھ اتحاد کیا، انتہاپسند افراد کی حمایت کی اور اقلیتی گروپوں کے خلاف نفرت اور غلط معلومات کو پھیلایا۔ انہوں نے یہ بھی کہا کہ ایلون مسک کینیڈا کی سیاست میں بھی مداخلت کر رہے ہیں، خاص طور پر وہ کنزرویٹو پارٹی کے موجودہ رہنما کی حمایت کر رہے ہیں اور وزیرِاعظم جسٹن ٹروڈو پر تنقید کر رہے ہیں۔
یاد رہے کہ کینیڈا کے وزیرِاعظم جسٹن ٹروڈو نے حالیہ دنوں میں اپنے عہدے سے مستعفی ہونے کا اعلان کیا ہے اور ملک میں اسی سال انتخابات ہونے والے ہیں۔ اس تمام صورتحال کے تناظر میں، چارلی اینگس نے ایلون مسک کی ممکنہ سیاسی مداخلت کی تحقیقات کے لیے الیکشنز کینیڈا سے مطالبہ کیا ہے تاکہ کسی بھی غیر قانونی یا غیر جمہوری اثرات کو روکا جا سکے۔
