سعودی ولی عہد شہزادہ محمد بن سلمان اور امریکی صدر ڈونلڈ ٹرمپ کے درمیان ایک اہم ٹیلیفونک رابطہ ہوا، جس میں دونوں رہنماؤں نے دو طرفہ تعلقات کو مزید مستحکم کرنے اور باہمی دلچسپی کے امور پر گفتگو کی۔
شہزادہ محمد بن سلمان نے امریکی صدر کو منصب سنبھالنے پر مبارکباد دیتے ہوئے امریکی عوام اور قیادت کے لیے نیک خواہشات کا اظہار کیا۔ بات چیت کے دوران دونوں رہنماؤں نے تجارتی اور سرمایہ کاری کے شعبے میں تعلقات کو فروغ دینے پر اتفاق کیا۔ شہزادہ محمد بن سلمان نے کہا کہ سعودی عرب اگلے چار سالوں میں 600 بلین ڈالرز کی سرمایہ کاری اور تجارتی حجم بڑھانے کا ارادہ رکھتا ہے، جو دونوں ممالک کے درمیان اقتصادی تعلقات کو نئی بلندیوں تک لے جائے گا۔
دونوں رہنماؤں نے دہشت گردی کے خلاف تعاون کو بڑھانے اور مشرق وسطیٰ میں امن و سلامتی کو یقینی بنانے کے لیے مشترکہ اقدامات پر بھی تبادلہ خیال کیا۔ اس دوران شہزادہ محمد بن سلمان نے سعودی عرب کی جانب سے دہشت گردی کے خاتمے میں اپنے عزم کو دہرایا، جبکہ امریکی صدر نے سعودی عرب کے ساتھ تمام شعبوں میں تعاون کو فروغ دینے کا عندیہ دیا۔
یہ رابطہ دونوں ممالک کے درمیان قریبی تعلقات اور باہمی مفادات کو آگے بڑھانے کی عکاسی کرتا ہے۔ سعودی ولی عہد اور امریکی صدر نے اس بات پر بھی زور دیا کہ اقتصادی ترقی اور عالمی سلامتی کے لیے مشترکہ اقدامات وقت کی اہم ضرورت ہیں۔
