انٹرنیشنل کرکٹ کونسل (آئی سی سی) چیمپئنز ٹرافی کے لیے پاکستان ون ڈے اسکواڈ کو حتمی شکل دینے کے لیے مشاورت کا سلسلہ جاری ہے۔ ذرائع کے مطابق پاکستان ٹیم چیمپئنز ٹرافی سے قبل سہ فریقی سیریز میں حصہ لے گی، جس میں جنوبی افریقا اور نیوزی لینڈ کی ٹیمیں بھی شامل ہوں گی۔
ذرائع کا کہنا ہے کہ اگر صائم ایوب فٹ نہ ہو سکے تو سلیکٹرز نے متبادل کھلاڑی کو شامل کرنے کا فیصلہ کیا ہے۔ تاہم، اگر صائم ایوب ٹیم کے لیے دستیاب ہوئے تو سہ فریقی سیریز کا اسکواڈ ہی چیمپئنز ٹرافی کے لیے منتخب کیا جائے گا۔
اسکواڈ کے حوالے سے اطلاعات ہیں کہ آؤٹ آف فارم کھلاڑی عبداللّٰہ شفیق اور عثمان خان کو ممکنہ طور پر ڈراپ کیا جا سکتا ہے، جبکہ فخر زمان کی شمولیت یقینی قرار دی جا رہی ہے۔ امام الحق اور حسیب اللّٰہ کے ناموں پر بھی غور جاری ہے۔
دیگر ممکنہ کھلاڑیوں میں محمد رضوان، بابر اعظم، سلمان علی آغا، طیب طاہر، عرفان خان، اور کامران غلام شامل ہیں۔ بولنگ یونٹ میں محمد حسنین، نسیم شاہ، شاہین آفریدی، حارث رؤف، ابرار احمد، اور سفیان مقیم اسکواڈ کا حصہ بن سکتے ہیں۔
چیمپئنز ٹرافی کے لیے تمام ٹیموں نے اپنے اسکواڈز کا اعلان کر دیا ہے، جبکہ پاکستان نے ابتدائی اسکواڈ کے نام آئی سی سی کو ارسال کر دیے ہیں۔ 11 فروری تک حتمی اسکواڈ کا اعلان ضروری ہے۔ سہ فریقی سیریز کا پہلا میچ 8 فروری کو کھیلا جائے گا۔
