روس اور ایران کے صدور نے کریملن میں ایک اہم جامع اسٹریٹجک پارٹنر شپ معاہدے پر دستخط کیے ہیں، جس میں دونوں ممالک کے درمیان فوجی، سیکیورٹی اور توانائی کے شعبوں میں تعاون کو مزید مستحکم کرنے پر اتفاق کیا گیا۔ روسی صدر ولادی میر پیوٹن نے اس موقع پر ایران میں دو نیوکلیئر پاور پلانٹس کے قیام کا اعلان کیا۔ انہوں نے کہا کہ ایران کے لیے نئے جوہری ری ایکٹرز کی تعمیر میں تاخیر کے باوجود روس مزید جوہری منصوبے شروع کرنے کے لیے تیار ہے۔
پیوٹن نے اس معاہدے کو ایران اور روس کے درمیان تعلقات کے لیے سنگ میل قرار دیتے ہوئے کہا کہ اس معاہدے کے ذریعے دونوں ممالک اپنے مشترکہ فوجی خطرات کا مقابلہ کرنے کے قابل ہوں گے اور مشکلات پر قابو پا کر آگے بڑھ سکیں گے۔ معاہدے میں سیکیورٹی سروسز، فوجی مشقیں، افسران کی ٹریننگ اور دوسرے فوجی امور میں تعاون کی بات کی گئی ہے۔
روسی صدر نے مزید کہا کہ ایران یا روس پر حملہ کرنے والے کسی ملک کو فوجی امداد فراہم نہیں کی جائے گی۔ اس کے علاوہ، ایران کو یوکرین کی صورتحال پر بھی مسلسل آگاہ رکھا جائے گا۔
اس موقع پر ایرانی صدر مسعود پیزشکیان نے اس امید کا اظہار کیا کہ یوکرین کی جنگ جلد مذاکرات کی میز پر ختم ہو گی۔ انہوں نے کہا کہ دونوں ممالک کے درمیان مذاکرات اور امن کے حصول کے لیے مشترکہ کوششوں کا خیرمقدم کیا جائے گا۔
یہ معاہدہ ایران اور روس کے درمیان اقتصادی، سیکیورٹی اور توانائی کے شعبوں میں بڑھتی ہوئی تعاون کی علامت ہے، جس سے دونوں ممالک کی عالمی سطح پر پوزیشن مضبوط ہو سکتی ہے۔
