وزیرِ اطلاعات پنجاب عظمیٰ بخاری نے اپنے بیان میں کہا ہے کہ ہمارے دوست ممالک کو بھی معلوم ہو چکا ہے کہ ملک میں انتشار پھیلانے والے کون ہیں۔ انہوں نے الزام عائد کیا کہ یہ لوگ ڈی چوک سے مال و اسباب چھوڑ کر فرار ہو گئے تھے، اور ان کی دی گئی “فائنل کال” بھی محض ایک “مس کال” ثابت ہوئی۔
عظمیٰ بخاری نے مزید کہا کہ اوورسیز پاکستانی اس شخص کا ایجنڈا واضح طور پر دیکھ چکے ہیں، جس کا مقصد ملک کی تباہی کے سوا کچھ نہیں۔ انہوں نے کہا کہ کوئی بھی ذی شعور پاکستانی ایسے شخص کی حمایت نہیں کر سکتا جو پاکستان کی ترقی میں رکاوٹ بن رہا ہو۔
اپنے بیان میں وزیرِ اطلاعات نے مریم نواز کے اقدامات کو سراہتے ہوئے کہا کہ مریم نواز نے واضح کر دیا ہے کہ روٹی کی قیمت کم کرنا اور عوام کو بنیادی سہولیات فراہم کرنا وزیرِ اعلیٰ کی ذمہ داری ہوتی ہے۔ عظمیٰ بخاری نے مزید کہا کہ مریم نواز کی قیادت میں حکومت یہ یقینی بنائے گی کہ کوئی بھی بچہ تعلیم سے محروم نہ رہے اور عوام کو بنیادی ضروریات فراہم کی جائیں۔
عظمیٰ بخاری نے اپنے خطاب میں عوام سے اپیل کی کہ وہ ملک میں امن و ترقی کے لیے ایسے عناصر کا ساتھ نہ دیں جو صرف انتشار پھیلانے کے خواہاں ہیں۔ انہوں نے مریم نواز کے وژن کو پاکستان کی خوشحالی کی ضمانت قرار دیا۔
