بالی ووڈ کے معروف اداکار ورون دھون اور ان کی اہلیہ نتاشا دلال نے ممبئی کے مشہور علاقے جوہو میں ایک قیمتی اور مہنگی پراپرٹی خریدی ہے۔ بھارتی میڈیا کی رپورٹس کے مطابق، اس جوڑے نے ایک زیر تعمیر عمارت کی ساتویں منزل پر ایک اپارٹمنٹ خریدا ہے جس کی قیمت 44 کروڑ 52 لاکھ روپے ہے۔
اس اپارٹمنٹ کا کل رقبہ 5112 مربع فٹ ہے اور اس میں 4 گاڑیوں کی پارکنگ کی جگہ بھی شامل ہے۔ پراپرٹی کا یہ منصوبہ 31 مئی 2025 تک مکمل ہوگا۔ ورون دھون نے اس جائیداد کی رجسٹریشن 3 دسمبر 2024 کو مکمل کی اور اسٹیمپ ڈیوٹی کے طور پر 2.67 کروڑ روپے ادا کیے۔
جوہو کے علاقے میں جہاں ورون دھون اور نتاشا دلال نے یہ پراپرٹی خریدی ہے، وہاں بالی ووڈ کی کئی مشہور شخصیات کے گھر بھی موجود ہیں، جن میں امیتابھ بچن، اکشے کمار، اجے دیوگن، شاہ رخ خان، کاجول، دھرمیندر اور عامر خان شامل ہیں۔
یہ پراپرٹی ورون دھون کے لیے ایک اور قیمتی جائیداد کا اضافہ ہے، کیونکہ وہ پہلے ہی ایک اپارٹمنٹ کے مالک ہیں جس کی قیمت تقریباً 60 کروڑ روپے ہے۔ یہ خریداری ورون دھون اور نتاشا دلال کی زندگی کے ایک نئے اور شاندار باب کا آغاز ہے۔
