نیویارک: اقوام متحدہ کے سیکریٹری جنرل انتونیو گوتریس نے بلوچستان میں جعفر ایکسپریس پر ہونے والے حملے کی شدید مذمت کرتے ہوئے یرغمال بنائے گئے افراد کی فوری رہائی کا مطالبہ کیا ہے۔
اقوام متحدہ کے ترجمان اسٹیفان دوجارک نے اپنے بیان میں کہا کہ انتونیو گوتریس شہریوں پر حملوں کو ناقابل قبول سمجھتے ہیں اور عالمی برادری پر زور دیتے ہیں کہ وہ ایسے واقعات کی روک تھام کے لیے موثر اقدامات کرے۔
یہ واقعہ منگل کے روز پیش آیا جب مبینہ طور پر بلوچ مسلح افراد نے جعفر ایکسپریس کو نشانہ بنایا۔ یہ ٹرین کوئٹہ سے پشاور جا رہی تھی اور اس میں تقریباً 500 مسافر سوار تھے۔ حملہ بلوچستان کے علاقے گُدالار اور پیرو کونڑی کے درمیان ہوا، جہاں حملہ آوروں نے ٹرین کو پٹری سے اتار کر مکمل طور پر قابو میں لے لیا۔
بلوچستان لبریشن آرمی (BLA) نے حملے کی ذمہ داری قبول کرتے ہوئے دعویٰ کیا کہ انہوں نے چھ سیکیورٹی اہلکاروں کو ہلاک کیا اور 100 سے زائد افراد کو یرغمال بنا لیا، جن میں مسافر اور سیکیورٹی اہلکار شامل ہیں۔ مسلح گروہ نے مزید دھمکی دی کہ اگر پاکستانی فوج کی جانب سے کوئی آپریشن کیا گیا تو تمام یرغمالیوں کو قتل کر دیا جائے گا۔
یہ حملہ بلوچستان میں سیکیورٹی چیلنجز کو مزید پیچیدہ بنا رہا ہے، جبکہ حکومت اور قانون نافذ کرنے والے ادارے صورتحال کا جائزہ لے رہے ہیں۔ اقوام متحدہ سمیت عالمی برادری نے حملے پر تشویش کا اظہار کیا ہے اور امن و استحکام کے لیے مشترکہ کوششوں کی ضرورت پر زور دیا ہے۔
