اسلام آباد کی انسداد دہشت گردی عدالت نے پاکستان تحریک انصاف (پی ٹی آئی) کے رہنماؤں اور وکلا کے خلاف سپریم کورٹ کے باہر احتجاج کے مقدمات میں نامزد ملزمان کی عبوری ضمانت میں توسیع کر دی ہے۔
انسداد دہشت گردی عدالت کے جج ابوالحسنات محمد ذوالقرنین نے کیس کی سماعت کی، جس میں پی ٹی آئی رہنما شبلی فراز، لطیف کھوسہ، سلمان اکرم راجا اور دیگر ملزمان عدالت میں پیش ہوئے۔ دوران سماعت، شبلی فراز نے مؤقف اختیار کیا کہ وہ تفتیش میں شامل ہونا چاہتے ہیں، لیکن اب تک ان کا بیان ریکارڈ نہیں کیا جا رہا۔
عدالت نے دلائل سننے کے بعد تمام ملزمان کی عبوری ضمانت میں 5 مئی تک توسیع کر دی۔ وکیل صفائی نے عدالت کو آگاہ کیا کہ انہوں نے سی سی ٹی وی فوٹیجز حاصل کرنے کے لیے باضابطہ درخواست دی تھی، تاہم ابھی تک کوئی پیش رفت نہیں ہوئی۔ وکیل نے عدالت سے استدعا کی کہ سی سی ٹی وی فوٹیجز کے حصول کے لیے متعلقہ حکام کو حکم جاری کیا جائے تاکہ مقدمے کے شواہد مکمل کیے جا سکیں۔
خیال رہے کہ ملزمان کے خلاف تھانہ سیکرٹریٹ میں دو مختلف مقدمات درج ہیں، جن میں سپریم کورٹ کے باہر احتجاج کے دوران پیش آنے والے واقعات کے الزامات عائد کیے گئے ہیں۔ عدالت نے کیس کی مزید سماعت آئندہ تاریخ تک ملتوی کر دی۔
