برطانیہ کی ایک بائیں بازو سے تعلق رکھنے والی تنظیم کی جانب سے جاری کردہ ویڈیو میں دعویٰ کیا گیا ہے کہ ایلون مسک، جو ٹیسلا اور سوشل میڈیا پلیٹ فارم ایکس (سابقہ ٹوئٹر) کے مالک ہیں، نے ڈونلڈ ٹرمپ کو دوبارہ جیت میں مدد فراہم کی۔ اس ویڈیو میں الزامات لگائے گئے ہیں کہ مسک کی جانب سے ٹوئٹر کی خریداری کے بعد، اس پلیٹ فارم پر کئی ایسے اقدامات کیے گئے جنہوں نے ٹرمپ کے حامیوں کو تقویت دی۔
ویڈیو میں کہا گیا ہے کہ ایلون مسک نے 14 اپریل 2022 کو ٹوئٹر کو 44 ارب ڈالر میں خریدنے کی بولی دی اور 27 اکتوبر کو یہ ڈیل مکمل کر لی۔ ویڈیو میں مزید دعویٰ کیا گیا کہ اگلے ہی روز اسپیکر نینسی پلوسی کے گھر پر حملہ کیا گیا، جس میں ان کے شوہر کو زخمی کر دیا گیا۔ مسک نے اس واقعے کے بعد ایک متنازعہ ٹوئٹ میں دعویٰ کیا کہ پلوسی کے شوہر نے نشے کی حالت میں ایک مرد طوائف کے ساتھ جھگڑا کیا، تاہم بعد میں اس ٹوئٹ کو ڈیلیٹ کر دیا۔
یہ بھی بتایا گیا کہ 18 نومبر 2022 کو مسک نے ٹوئٹر پر ان افراد کی پابندی ختم کر دی جن پر ماضی میں نفرت انگیزی یا دیگر الزامات کے باعث پابندی عائد کی گئی تھی۔ ان افراد میں ایک ایسے شخص کو بھی شامل کیا گیا جو خواتین کے خلاف نفرت انگیز رویہ اختیار کرتا تھا اور بعد میں انسانی اسمگلنگ کے الزام میں رومانیہ میں گرفتار ہوا۔
ویڈیو کے مطابق، مسک کے ٹوئٹر خریدنے کے بعد سے سیاہ فاموں اور ہم جنس پرستوں کے خلاف نفرت انگیز تبصروں میں اضافے کی شکایات سامنے آئیں، اور اس دوران تین ٹوئٹر کونسل کے ارکان نے استعفیٰ بھی دیا۔ جولائی 2023 میں مسک نے ٹوئٹر کا نام تبدیل کر کے ایکس رکھ دیا اور مختلف پالیسی تبدیلیوں کے نتیجے میں کئی بڑے اداروں نے ٹوئٹر کو اشتہارات دینا بند کر دیے، جس پر مسک نے ان اداروں پر کڑی تنقید کی۔
ویڈیو میں یہ دعویٰ بھی کیا گیا ہے کہ امریکی وراثتی میڈیا نے ڈونلڈ ٹرمپ کے سیاسی کیریئر کو ختم کرنے کی بھرپور کوشش کی، لیکن ناکام رہے۔
