آسٹریلوی اوپنر ڈیوڈ وارنر، جو اپنی جارحانہ بیٹنگ اور زبردست فارم کی بدولت دنیا بھر میں شہرت رکھتے ہیں، اب پاکستان سپر لیگ (پی ایس ایل) کے 10ویں ایڈیشن میں کراچی کنگز کی نمائندگی کرتے نظر آئیں گے۔ وارنر اس سیزن میں کراچی کنگز کے کپتان ہونے کے ساتھ ساتھ پی ایس ایل کے سب سے مہنگے کھلاڑی بھی بن چکے ہیں۔
ذرائع کے مطابق کراچی کنگز نے ڈیوڈ وارنر کو پلیٹینم کٹیگری میں 3 لاکھ امریکی ڈالر، یعنی پاکستانی کرنسی میں تقریباً 8 کروڑ 41 لاکھ روپے سے زائد رقم میں اپنی ٹیم کا حصہ بنایا ہے۔ وارنر کی شمولیت سے کراچی کنگز کے اسکواڈ میں مزید تجربہ اور طاقت شامل ہو گئی ہے، جو انہیں سیزن میں مضبوط حریف ثابت کرے گی۔
تاہم اس کے مقابلے میں اگر انڈین پریمیئر لیگ (آئی پی ایل) میں وارنر کی تنخواہ پر نظر ڈالی جائے تو واضح فرق سامنے آتا ہے۔ وارنر رواں سال کے آئی پی ایل سیزن میں دہلی کیپیٹلز کی جانب سے کھیل رہے ہیں، جہاں انہیں 6.25 کروڑ بھارتی روپے معاوضہ دیا جا رہا ہے۔ یہ رقم پاکستانی کرنسی میں پی ایس ایل کے معاوضے سے تقریباً دوگنی بنتی ہے، جو دنیا کی دو بڑی لیگز کے درمیان تنخواہوں کے فرق کو ظاہر کرتی ہے۔
واضح رہے کہ ڈیوڈ وارنر کا شمار دنیا کے ان چند کھلاڑیوں میں ہوتا ہے جو لیگز میں مسلسل مہنگے ترین معاہدوں کا حصہ رہے ہیں۔ اپنے کیریئر کے عروج کے دنوں، یعنی 2019 سے 2021 تک، وارنر نے آئی پی ایل میں 12.5 کروڑ بھارتی روپے فی سیزن کے معاہدے پر کھیل کر اپنی مارکیٹ ویلیو ثابت کی تھی۔
پی ایس ایل میں ان کی آمد نہ صرف کراچی کنگز کے لیے حوصلہ افزا خبر ہے بلکہ شائقین کرکٹ کے لیے بھی ایک پرجوش موقع ہے، جو وارنر جیسے عالمی شہرت یافتہ بلے باز کو پاکستانی میدانوں میں ایکشن میں دیکھنے کے منتظر ہیں۔
