موجودہ حکومت کے ابتدائی 8 ماہ میں بھارت سے درآمدات میں چوتھی بار اضافہ ریکارڈ کیا گیا ہے۔
وزارت تجارت کے ذرائع کے مطابق، تجارت معطل ہونے کے باوجود بھارت سے درآمدات میں ایک بار پھر اضافہ دیکھنے کو ملا ہے، اور رواں مالی سال کے اکتوبر میں مسلسل تیسرے مہینے بھارت سے درآمدات میں اضافہ ریکارڈ کیا گیا۔
ذرائع کا کہنا ہے کہ اکتوبر 2024 میں بھارت سے سالانہ بنیاد پر درآمدات میں 46 فیصد کا اضافہ ہوا، اور اکتوبر 2024 میں بھارت سے درآمدات کا حجم 3 کروڑ 58 لاکھ ڈالرز تک پہنچا، جبکہ اکتوبر 2023 میں یہ حجم 2 کروڑ 45 لاکھ ڈالرز تھا۔
اس سے قبل ستمبر 2024 میں بھارت سے درآمدات میں سالانہ 45 فیصد اور اگست 2024 میں 5 فیصد اضافہ ہوا تھا۔ یاد رہے کہ پاکستان نے اگست 2019 میں مقبوضہ کشمیر کی خصوصی حیثیت ختم کرنے کے بعد بھارت کے ساتھ تجارت معطل کر دی تھی، تاہم حکومتی ذرائع کا کہنا ہے کہ بعد میں پاکستان نے بھارت کے ساتھ تجارت میں نرمی کی اور دونوں ممالک کے درمیان زندگی بچانے والی ادویات کی تجارت کی اجازت بھی دی گئی تھی۔
