وزیراعظم پاکستان شہباز شریف نے باکومیں ہونے والے کلائمیٹ ایکشن سربراہی اجلاس (کاپ 29) کے دوران آذربائیجان کے صدر الہام علیوف سے ملاقات کی، جس میں دونوں ممالک کے درمیان مختلف شعبوں میں تعاون کو مزید بڑھانے کے عزم کا اظہار کیا گیا۔ اس ملاقات میں ٹیکنالوجی اور قابل تجدید توانائی کے مشترکہ منصوبوں پر بات چیت کی گئی، جس کے تحت پاکستان اور آذربائیجان کے درمیان اقتصادی و تجارتی تعلقات کو مزید مستحکم کرنے کے امکانات پر زور دیا گیا۔
وزیراعظم نے اس موقع پر کہا کہ پاکستان موسمیاتی تبدیلیوں سے سب سے زیادہ متاثر ہونے والے ممالک میں شامل ہے، حالانکہ اس کا زہریلی گیسوں کے اخراج میں حصہ بہت کم ہے۔ انہوں نے آذربائیجان کے صدر سے کہا کہ دونوں ممالک موسمیاتی تبدیلیوں کے خلاف مشترکہ اقدامات اٹھانے میں تعاون کرسکتے ہیں۔
مزید برآں، وزیراعظم شہباز شریف نے چین کے نائب وزیرِاعظم ڈنگ شوئی شیانگ سے بھی ملاقات کی، جس میں انہوں نے پاکستان اور چین کے دیرینہ تعلقات کو مزید مستحکم کرنے کی ضرورت پر زور دیا۔ وزیراعظم نے کہا کہ پاکستان چین کے ساتھ اپنی شراکت داری کو نئی بلندیوں تک لے جانا چاہتا ہے اور دونوں ممالک کے درمیان سکیورٹی چیلنجز کے حل اور معاشی ترقی کے لیے مزید اقدامات اٹھائے جائیں گے۔
انہوں نے اس بات پر بھی زور دیا کہ حکومت پاکستان چینی شہریوں کی سیکیورٹی کو یقینی بنانے کے لیے ہر ممکن قدم اٹھا رہی ہے اور دہشت گردی کے خاتمے کے لیے پرعزم ہے۔ شہباز شریف نے پاکستان اور چین کے درمیان جاری تعاون کے تحت دہشت گردی کے خلاف مشترکہ اقدامات کی ضرورت کو اجاگر کیا اور دونوں ممالک کے عوام کی ترقی و خوشحالی کے لیے مزید تعاون کی خواہش کا اظہار کیا۔
یہ ملاقاتیں دونوں ممالک کے درمیان دوطرفہ تعلقات کو مزید مستحکم کرنے کی ایک اہم پیشرفت ہیں، جن میں اقتصادی، سکیورٹی اور ماحولیاتی شعبوں میں تعاون کو فروغ دینے کے لئے نئے امکانات پر غور کیا گیا۔
