کراچی:کپتانی کا دباؤ ختم ہونے کے بعد انگلش بیٹر جوز بٹلر کی بیٹنگ میں نمایاں بہتری دیکھنے میں آ رہی ہے۔ وہ آئی پی ایل میں بھرپور آزادی کے ساتھ اپنی بیٹنگ سے لطف اندوز ہو رہے ہیں اور بہترین کارکردگی کا مظاہرہ کر رہے ہیں۔ گجرات ٹائٹنز کی نمائندگی کرتے ہوئے بٹلر نے تین میں سے دو میچز میں نصف سنچریاں اسکور کیں، جس سے ان کے فارم میں واپسی کا واضح اشارہ ملا ہے۔
حالیہ میچ میں، سابق انگلش کپتان نے رائل چیلنجرز بنگلور کے خلاف شاندار بلے بازی کا مظاہرہ کیا اور صرف 39 گیندوں پر ناقابل شکست 73 رنز بنا کر اپنی ٹیم کی فتح میں کلیدی کردار ادا کیا۔ اس میچ کے بعد میڈیا سے گفتگو کرتے ہوئے بٹلر نے انکشاف کیا کہ وہ گزشتہ چند ماہ سے کرکٹ سے لطف اندوز نہیں ہو رہے تھے، لیکن اب وہ مکمل آزادی کے ساتھ بیٹنگ کر رہے ہیں اور بہترین کارکردگی پیش کرنے کی کوشش میں ہیں۔
یاد رہے کہ جوز بٹلر کی قیادت میں انگلینڈ ٹی 20 اور ون ڈے ورلڈ کپ کے ٹائٹل کا دفاع کرنے میں ناکام رہا تھا، اور خود انہیں بھی رنز بنانے میں مشکلات کا سامنا کرنا پڑا تھا۔ چیمپیئنز ٹرافی میں مایوس کن کارکردگی کے بعد بٹلر نے انگلینڈ کی وائٹ بال ٹیم کی قیادت سے استعفیٰ دے دیا تھا، جس کے بعد ان کی بیٹنگ میں ایک نیا اعتماد نظر آ رہا ہے۔ ماہرین کے مطابق قیادت کے بوجھ سے آزاد ہونے کے بعد بٹلر اب اپنی نیچرل بیٹنگ پر زیادہ توجہ دے رہے ہیں، جس کا مثبت اثر ان کی کارکردگی پر پڑ رہا ہے۔
