طالبان کے وفد نے متحدہ عرب امارات کے وزیر خارجہ شیخ عبداللہ بن زاید سے ملاقات کی، جس میں افغانستان کی ترقی کے لیے امارات نے اپنی مکمل حمایت کا یقین دلایا۔ طالبان کی وزارت خارجہ کی جانب سے جاری کردہ ایک بیان میں کہا گیا کہ دونوں رہنماؤں کے درمیان ملاقات میں دو طرفہ تعلقات، اقتصادی تعاون، اور علاقائی ترقی پر تفصیل سے گفتگو کی گئی۔
بیان کے مطابق، افغانستان اور متحدہ عرب امارات کے درمیان تجارتی تعلقات بڑھانے اور افغان تاجروں کے لیے مارکیٹنگ کے نئے مواقع فراہم کرنے کی تکنیکی کوششیں شروع کرنے کا فیصلہ کیا گیا۔ دونوں ممالک نے اس بات پر زور دیا کہ اقتصادی تعلقات کو مزید مستحکم کرنے کی ضرورت ہے تاکہ دونوں ممالک کے درمیان تعلقات میں اضافہ ہو سکے۔
اسی دوران افغان طالبان کی بھارتی حکام کے ساتھ دبئی میں بھی ملاقات ہوئی۔ بھارتی حکام کے مطابق، سیکریٹری خارجہ وکرم مشری اور افغان طالبان کے قائم مقام وزیر خارجہ مولوی امیر خان متقی کی ملاقات میں بھارت نے افغان طالبان کو دوستی کا پیغام دیا۔ اس ملاقات میں چابہار بندرگاہ سے باہمی تجارتی سرگرمیوں کو فروغ دینے اور افغان بھارت کرکٹ تعاون کو مزید مستحکم کرنے پر بھی اتفاق کیا گیا۔
یہ ملاقاتیں افغانستان کی موجودہ سیاسی صورتحال اور معیشت کو مستحکم کرنے کی ایک بڑی کوشش کے طور پر دیکھی جا رہی ہیں، جس میں عالمی سطح پر افغانستان کی اقتصادی ترقی کو فروغ دینے کے اقدامات کی بات کی جا رہی ہے۔
