سندھ حکومت کا بڑا اقدام: کراچی میں پبلک کمپلینٹ سیل فعال

کراچی( پاکستان خبر) سندھ حکومت نے عوامی شکایات کے فوری ازالے کے لیے چیف منسٹر سیکریٹریٹ کراچی میں پبلک کمپلینٹ سیل فعال کر دیا ہے۔اس سیل میں وزرا، مشیر اور ترجمانوں کی ڈیوٹیاں مقرر کی گئی ہیں تاکہ شہری اپنے مسائل براہِ راست حکومتی نمائندوں کے سامنے رکھ سکیں اور فوری ریلیف حاصل کر سکیں۔ سیل صبح 9 بجے سے شام 5 بجے تک فعال رہے گا اور روزانہ کی بنیاد پر مختلف حکومتی نمائندوں کا شیڈول جاری کیا گیا ہے۔مقرر کردہ شیڈول میں سینئر صوبائی وزیر شرجیل انعام میمن، وزیر بلدیات سید ناصر حسین شاہ، سعید غنی اور ڈاکٹر عذرا فضل پیچوہو شامل ہیں، جبکہ میئر کراچی سمیت دیگر اہم شخصیات اور ترجمان بھی ڈیوٹی سرانجام دیں گے۔سندھ حکومت نے عوامی شکایات کے بروقت حل کے لیے مانیٹرنگ کا نظام بھی متعارف کرایا ہے، جس سے چیف منسٹر سیکریٹریٹ میں اوپن ڈور سسٹم کے نفاذ کے ذریعے شہریوں کے مسائل کا فوری ازالہ ممکن ہوگا۔