پی ایس ایل سے باہر، احمد شہزاد لائیو شو میں بیٹے کے لیے آنکھوں سے رو پڑے

لاہور( سپورٹس ڈیس)سابق پاکستانی اوپننگ بلے باز احمد شہزاد پاکستان سپر لیگ (پی ایس ایل) کے گیارہویں سیزن کے لیے منتخب نہ ہونے پر ایک نجی ٹی وی لائیو شو میں جذباتی ہوگئے۔پروگرام میں میزبان تابش ہاشمی نے احمد شہزاد سے سوال کیا کہ آپ پی ایس ایل کی وننگ ٹیم کا حصہ رہ چکے ہیں لیکن گزشتہ تین سال سے لیگ سے باہر ہیں، تو آپ کو کیسا لگتا ہے؟اس پر احمد شہزاد نے کہا، ’’مجھے اپنے لیے بہت دکھ ہوتا ہے، ساتھی کھلاڑیوں کو دیکھ کر خوشی بھی ہوتی ہے لیکن اپنے لیے افسردہ ہوجاتا ہوں۔‘‘انہوں نے مزید آبدیدہ ہوکر بتایا، ’’سب سے زیادہ دکھ اس بات کا ہے کہ میرا بیٹا اب 9 سال کا ہوگیا ہے اور وہ مجھے کھیلتا دیکھنا چاہتا ہے۔‘‘میزبان تابش ہاشمی نے صورتحال دیکھ کر فوری طور پر احمد شہزاد کے پاس جا کر انہیں گلے لگا کر تسلی دی۔احمد شہزاد نے آنکھوں سے جاری اشکوں کے ساتھ کہا، ’’بیٹا میرے ساتھ سوتا ہے، وہ کہتا ہے بابا مجھے یاد ہے آپ کھیلتے تھے لیکن اب میں آپ کو اچھے طریقے سے یاد رکھ پاؤں گا۔‘‘انہوں نے اعتراف کیا کہ وہ خوش ہیں لیکن یہ احساس دل کو چھو گیا اور انہیں شدید دکھ پہنچا۔