انٹرویوز لینے کے لیے اب کسی کو بھی میرے پاس آنے کی ضرورت نہیں:راشد محمود

 لاہور( شوبز ڈیسک)پاکستان شوبز انڈسٹری کے سینئر اداکار راشد محمود نے حالیہ دنوں میں یوٹیوبرز کے رویے پر گہرا دکھ اور افسوس کا اظہار کیا ہے۔ انہوں نے واضح کیا کہ انہیں کسی کی ضرورت نہیں اور انٹرویوز لینے کے لیے ان کے پاس آنے کی ضرورت نہیں۔راشد محمود پاکستان کے معروف فلم اور ٹی وی اداکار ہیں، جنہوں نے شاہین، نظام، کاجل گھر، اندھیرا اجالا، مرزا غالب، ریاست، محبت روٹھ جائے تو اور دیگر کلاسک ڈراموں میں شاندار اداکاری کے جوہر دکھائے۔ وہ زیادہ تر منفی کرداروں میں جانے جاتے ہیں اور حکومت پاکستان کی جانب سے ان کی خدمات کے اعتراف میں انہیں پرائیڈ آف پرفارمنس سے بھی نوازا جا چکا ہے۔چند روز قبل، اداکار نے اپنی بیماری کے بارے میں مداحوں کو بتایا کہ وہ 21 دن سے بستر پر تھے اور اس دوران جناح اسپتال اور مختلف ڈاکٹروں کے زیرِ علاج رہے۔ حال ہی میں انہوں نے ایک ویڈیو میں یوٹیوبرز کی جانب سے غلط طریقے سے پیش کرنے کے حوالے سے اپنی ناراضگی کا اظہار کیا۔راشد محمود نے کہا کہ یوٹیوبرز انہیں اپنے چینلز کے ویوز اور مقبولیت کے لیے استعمال کر رہے ہیں اور انہیں ایسے پیش کر رہے ہیں جیسے وہ مالی مدد کے محتاج ہوں، حالانکہ انہوں نے کبھی کسی سے ایک پیسہ بھی نہیں مانگا۔ اداکار نے زور دے کر کہا کہ انٹرویوز کے دوران لگائی جانے والی ہیڈ لائنز اکثر ٹوئسٹ کی ہوئی ہوتی ہیں، جس سے ان کی عزت متاثر ہوتی ہے۔انہوں نے مداحوں کو بھی یقین دلایا کہ وہ پہلے ہی صحتیاب ہو رہے ہیں اور اللہ کے فضل سے بہتر ہوں گے۔ اداکار نے واضح کیا کہ وہ ٹھیک ہیں اور یوٹیوبرز براہ کرم ان کے پاس نہ آئیں۔